Hfuxye emwothoye cala hçome d’İsroyel calu İran

BRITHO Bi egartho dfrısle bi dafayde du nawlo, u rişono Amerikoyo Donald Trump huwle i hzaytayde cala hçome dsımla athmıl casriye İsroyel calu İran u grışle’ste u zuhoro, da hçome hathe gıdhowın qşeytır ma qamoye. Trump mırle; Hawi qatle ğalabe u hiwo husrono rabo. Elo heş kito zabno dmitaklın a qatlani, heş meqım dımşarın a hçome hathe dgıdowın qşeytır mani. U İran klozım dmode qyomo leşan dmaxlıs u mede dfayışle mi mamlaxthayde.

Cala hçomani dmabdela İsroyel, mınyono d’athrawotho Caraboye-bi rişonutho di Scudiye, Yurdnon, Coman, a İmarat, Qatar u acmaye’ste u Cıraq u Lebnon, krıhlın u mawdaclın ilo thnihuthathe cala cuqobani dsimi u dqtil mınyono d’mşale İranoye frişe. Bi sbuthathe i Scudiye mırla; Kıkurhina a hçomani a barbreoye u kısaymina qroyto lu kenşo Emwothoyo ulu Mawtbo di Mşaynutho d’Emwotho Mhaydotho dmaydi i mşaluthathe bnişo dmitakle u cnufyano.

İ wazirutho di baroyutho d’Turkiya’ste frısla maqırhonutho u mırla; U hçomano, kımadıl d’İsroyel lo kubco dmışre u qetrano bu darbo diplomatiqoyo. Kıtulbina dmitaklın a hçomano dkibın dmawbıli u qlimo l’qrobo qaşyo. İ mşalonitho da esore baroye du Huyodo d’Urifi Kaja Kallas mzaharla calu qento rabo dkito adyawma bu Madınho Mescoyo u mırla; Kıtulbina ma 2 gabe, dlo maqşın i aykanoyuthathe zıttır cal du darbo ihidoyo du şroyo da qetrani, u dialog’yo.

Bebzabno u malolo d’Kremlin d’Rusya Dmitry Peskov, mawdacle u ğamayde bi sbuthathe u krıhle u teqşiyo di mwatyuthathe beyn d’İsroyel u İran. U Sin’ste mawdacle u ğamayde u mawdacle dıkmtahqıb i sbutho me qariwwo u m’akadle, cali ulsoyutho dmınfıq moro lu şlomo uli şalyutho bu qlimo. U notarrozo gawonoyo du NATO Mark Rutte’ste mırle; Ulsoyo’yo d’Amerika uda bnay’amnayda dfulhi leşan dlo mitahwe aftho dmitaqşın a hçomani bu qlimo wu ahna kımcaqbina i sbuthathe me qariwo.