Hfuxye mqabıl d’Turkiya cal Ayasofya dmaqlıbo masığdo

Athmıl hiw u fusqono du rişqutno d’Turkiya Recep Tayip Erdoğan, dıtlıbwole dmitahwe mu bethdino celoyo du athro laşan di cito catıqto maktabzabnoyto d’Stanbıl Ayasofya dmişahılfo masığdo di maşılmonutho.

 Bıthır mu fusqonano hın athrawotho u şutose mahwelın ilo thınihuthathe mqabıl du fusqonano elo Erdoğan mawdacle d’24 bu yarhano yawme dı cruto gdımşarın dımsalın eba xıd masığdo di maşılmonutho.

 U hfuxyo qamoyo athi mu athro du Yawnan dkıtyo i cito d’Ayasofya cayıd di citathe. I şultonutho mırla; Hano provakasyon mqabıl dıbrithoyo. Ubi maqırhonutho dhuwla i wazırto di mardutho Lina Mendoni mırla; İ tuxmonoyutho dsımle Erdoğan, madcarle u athro  6 dore laxalf.

I rişathqutno Katarina Sakellaropoulou’ste mırla; Turkiya bu şuhlofo d’Ayasofya l’masığdo, tahrik makthabzabnoyo sımla. Wi wazirutho di baroyutho mawdacla du fusqonano mqabıl du tukoso d’UNESCO’yo. Bi maqırhonutho dhule UNESCO mawdacle, dıkdorış i ithutho d’Ayasofya dkıtyo bi lohitho di yortutho Emwothoyto.

Me gabo hreno u waziro di baroyutho di Gozarto d’Qufrus Nikos Hristodoulides mırle; Kıkurhina u fusqonano d’Turkiya u ksaymina qrayto dmanhıto a mşalonwotho tibeloye dkito la haye. Bi sbuthathe me Amerika, me Rusya mu Huyodo d’Urifi u ğer athrawotho mşahılfe fris maqırhonwotho dıhfuxye mqabıl du şuhlofo di cito d’Ayasofya l’masığdo, elo mın klayto gıdmaydi mqabıl d’Ankara dıkdayşo anarcotho da athrawotho şbobe Suriya udu Iraq u qatlo cala came mşahılfe lo mawdıc.

Bi sbuthathe a droşe mşarelın dkurxi qay bu zabnano Erdoğan mabdele hawxa maşıqlo, dawse siyasi’yo leşan dmoyıd qole zıttır yaste u ideoloji Maşılmono dkıtleyo. Yaste u hılmo dkıtle di osmanliye dmarkıw bkull duktho’yo.

Mede ha idicoyo, lo mıdle a renye dan athrawotho uda hayle mşahılfe li dıqa cal dlatwo hfuxye qaşye mqabıl dide. Xıdu mede dmawdacle, 24 bu yarhano yawme dıcruto gdımsalın eba. Bi sbuthathe mışkıl kımkasın a surutho di Mşihoyutho dkito eba yaste gıdtoranne ftihe. Hanoste şuwolo dgımitahwele bıthır funoyoyo.