Hıthimo i hamle di mcadronutho lu cameydan bu athro d’Lebnon

Urişono du gabo du huyodo Suryoyo tibeloyo Brahim Murad sımle mamlo bu huthomo di tarmitho di mcadronutho me Lebo l’Lebo dımdawamla tıre yarhe. İ tarmithathe simowa bi mcadronutho du camo Suryoyo-Othuroyo calu darbo du froshezwo d’Suroyo du camo mahwewole lhiqutho u hubo dımcawın u camo dkıtle casqutho da haye bu maşıqlano di Corona.

İ tarmithathe dımşarewola calu talab du gabo du huyodo d’Suryoyo tibeloyo dmiqadım mcadronutho mu camo di golutho lu cameydan dıkhoye bcasqutho bu athro d’Lebnon u ba falqe hırene du athro.

İ tarmithathe dımşarewola tahtıd du ışmo me lebo l’Lebo mdawamla tıre yarhe bu snodo da gabe u şutose du mawtbo umthoyo d’Bethnahrin wu camo di Golutho dhawi mcawnono.

İ tarmithathe kamilo bu mamlo dsımle u rişono Brahim Murad bu qentrun du gabo du huyodo Suryoyo tibeloyo. Bu mamleyde mırle adyoma mkamelan u feroqo da 1700 sanduqe du muklo dımfarqi ba fınyotho d’Lebnon, du lo nıkfutho kiban dımmina bu darğo qamoyo mfarqi lu cameydan u Suryoyo- Othuroyo-Kaldoyo, u bıthır mqadamlan mcadronwotho la yaqrotho da mazhabe hırene.

Murad mırle idicoyo damkone momunoye du gabeydan zcurene u latlan athro aw şıltonutho dımfaqina lkul noşe elo naqqa hreto hulan mcadronwotho la sniqoye kule di aykanoyuthathe latyo tawto mu maşıqlano du kewo di Corona dımatharla cal kul noşe.

Bıthır u rişono Murad mqadamle tawdiyotho lu camo Suryoyo u la şutoseyde dhawın mcawnone u sanode lu gabo d’Lebnon d’Suriya du Iraq u d’Turkiya.

Bu huthomo du mamleyde mırle wolithoyo acleyna dhowina sanode lu cameydan u lu athreydan.