Hiw myaqronutho l’hasyo Benyamen Ataş

U şutoso d’Locozor dıgforıs u kımdafıc cali mşihoyutho hule myaqronutho du nıshono l’mor Diyosqoros Benyamen Ataş u efetrufo fatıryarxoyo di marcitho du Swed di cito suryoyto ortoduksoyto.

İ myaqronuthathe dkıtyo u rımzeyda u slibo du nıshono di qadmoyutho hiw athmıl bu zawho dsim bi cito d’Mor Afrem d’Södertelje.

U şutoso d’Locozer d’hawile 900 ışne dkıtyo şutoso emwothoyo du nişeyde dımthabıt u dımdafıc i mşihoyuthoyo, bu şutosano dkito hadome u mathlone me athrawotho mşahılfe dkıtne bdarghe celoye ba athrawothathe.

U şutosano athmıl bu zuyoho dsim bi cito d’Mor Afrem d’Södertelje bi mtaybonutho da mşale du şutoso d’Locozer, abuna dayroyo Samuel Özdemir u abuna qaşişo Petrus dathınwo me Belçika, wu rişono di marcitho du Swed Suleyman Kurt cama hadome wu rişmawtbo di cito d’Mor Afrem Yılmaz Bısse u şutoso d’Locozer myaqarlın mor Diyosqoros Benyamen Ataş bu slibo du nıshono dkıtyo i myaqronutho celoyto du şutosano.

U ştosano myaqarlın u efetrufo fatıryarxoyo cala fulhoneyde dıksoyım laşan i mşihoyutho.

Bu mamlo dsımle Ataş mırle i myaqronuthathe dhiwo eli myaqronutho li cito Suryoyto Ortoduksoyto u lu camo Suryoyoyo, bi myaqronuthathe kmidic u camo Suryoyo ste bayn da hadome du şutoso d’Locozer u hedoraye.

Bıthır mi myaqronuthathe bu mamlo dsımle u rişono du mawtbo di marcitho du Swed Suleyman kurt mqadamle tawdiyotho lu şutoso d’Locozer dımyaqrlın u efetrufo fatıryarxoyo du Swed u bıthır mqadamle tahınyotho ele u mırle ahna kıtlan şubhoro bu hasyeydan dık mawdıc i citeydan ba esore dıksoyım bkul duktho.