Hiw turgomo calu maktabzabno d’MUB bu daşto d’Ninwe du Iraq

Hiw turgomo calu maktbazabno du Mawtbo Umthoyo d’Bethnahrin bu daşto d’Ninwe du Iraq.  Bu turgomano dımqadım mu hadomo di sicto mdabronitho d’MUB Bobel Gewargis wi mşalonitho du huyodo da neşe d’Bethnahrin Şmuni Arsan mahke cala fulhone dsımle u mawtbo dmarxaşle sabro hatho bu cameydan dıbritho.

 U turgomano dhiw la hadome da şutose du mawtbo dkıtle bu daşto d’Ninwe mahke cala dawsat qamoye dımhalaqle u mawtbo umthoyo d’Bethnahrin la turone d’Bethnahrin du Iraq xıd haylawotho folhoye Gerilla u bıthır i mşatsonutho dhawyo ba falqe du athro d’Bethnahrin.

Bu turgomano Bobel Gewargis mahkele cala dawsat folhoye dımhalqi b’Bethnahrin d’Suriya dmatın dmaydi u duyoqo di fnitho du Habur dkıtyo fnitho dilonoyto du cameydan.

Hdo ma nuqtotho dıkle aclaste u fulhono dsımle MUB bi sbutho di hdoyutho du camo da ışmone wa citawotho wa falqe du athro kule catirutho dha camo dkıtyo u camo şerşoyo d’Bethnahrin.

Gewargis bu mamleyde mırle a fulhone dsımle u mawtbo umthoyo d’Bethnahrin simi bu tacbo u bu texiro du admo da sohde dhiwi qurbono laşan i hirutho du camo Suryoyo-Othuroyo-Kaldoyo-Oromo cama ışmone hrene dkıtle u cameydan.

İ mşalonitho du huyodo da Neşe d’Bethnahrin Şmuni Arsan mazıdla u mahkela cali şawyutho dmahwele u mawtbo umthoyo d’Bethnahrin u mawxaste mşatıs u huyodo da neşe d’Bethnahrin dımhalaqle dawsat ba fulhone umthoye du cameydan bkul haqlo bi folhutho, bu tboco froso, ba esore, u bebzabno a neşeste mıdlın mşalutho ba darğe da fulhone kulle.

U turgomo kamıl ba şuwole u funoye dımşayıl la hadire dkıtweyne bu turgomano dsımwo bu qentrun du Huyodo d’Bethnahrin Athroyo b’Ankawa.