Hiw u fağro qadmoyo l’mınyono d’nacime bi qritho d’Bedaro
Bi qritho d’Bedaro du camaydan bu garbiyo du Iraq, hiw u fağro qadmoyo l’mınyono d’nacime di cito Kaldoyto d’Bobel.
Lu zawho du tehwiyo du fağro mqadşo, mıştawtafle u hasyo wa kohne di marcitho u 18 nacime cama yaqrothathe.
Kul şato xıd ucdo awkith bu şahro yarhonoyo d’Yuldath Aloho, a’citotho du camaydan bı Bethnahrin u dkıtne bi golutho, kımtaybi a’nacime da marciyotho laşan dhowın şawye dmaydi inaqla qamayto u rozo du fağro mqadşo d’Moran Yeşuc Mşiho. Mawxa ste a’nacime meqım mıditahwelın u fağro qamoyo kmitawlaflın a’slawotho rişoye da citotho Ortodoksoye u Qatholiqoye ukmitahwelın herge cala haye d’Moran Yeşuc Mşho.
Bu taro du cyodano u ruhonoyo, mtayıb 21 bu yarhano u zawho du tehwiyo du fağro mqadşo l’18 nacime mu camaydan di cito Kaldoyto d’Bobıl bi qritho d’Bedaro dıknıflo bi qastra d’Zaxo bu garbiyo du Iraq.
U zawhsano dımtayıb bi cito du Lebo Mqadşo d’Yeşuc, mrayşın mu hasyo di marcitho d’Zaxo Mor Filix Sacid Alşabi, u mıştawtaflel menyono celoyo d’kohne baynothaye u kohno di cito qaşişo Luay Cabdılmasih u xuroyo Joni Dawud cam menyono d’mhaymne baynothaye a’yaqrotho da 18 nacime dımqadamlın lu fağro mqadşo.
Bıthır mıdkamilo i slutho du qerowo camu zawho du tehwiyo du fağro, mtayıb hfitutho di fsihutho bu salon di cito du Lebo Mqadşo d’Yeşuc, u qtico i kuktho mu hasyo Mor Filix Alşabi.
Bıthır m’48 ışne, u tehwiyo du fağrano kmıhşu u qamoyo dkulle dıkmitahwe la nacime du camaydan di qritho d’Bedaro.
Bedaro qritho nacımtoyo du camaydan dıkrıhqo 2 kilomıtre mi mditho d’Zaxo bu garbiyo du Iraq, wu sukolayda bu leşono Suryoyo “wahdo du qrobo yo”.