HNB b’Giessen mtayabla taglitho d’8 Odor

GIESSEN – Athmıl, bi mıştawtıfonutho d’mşale tawdithoye u folitiqore d’gabe u şutose Almanoye, mtayable HNB i taklithayde b’Kirchplatz d’Giessen. Ba mele; b’reğşe di athto, kımqadmina a şlome wa iqoraydan la neşe du camaydan u kımmina i athto Hubo, Huyodo u Hayloyo u gıdmalxo li hirutho du camayda, mşarele u futoho di taklithathe dhadırla mınyono celoyo d’neşe u farsufe d’Giessen u dğer mdinotho hrene d’Almanya.  

Bu tarano mqadım mamle bu leşono Suryoyo, Almanoyo u Caraboyo me mşale frişe; beynothaye-cal ışme d’Clayme Suryoye Manuela Demir, cal ışme di Mtakasto da Neşe d’Bethnahrin b’Urifi-hwartho Ronak, cal ışme d’ESU Turkan Oçar ucal ışme d’HNB u fırco d’Urifi-i mşalonithayde Tibelya Ahrun. Ba mamlani dsimi mawdıc’ste, du yawmo d’8 Odor kull naqla hawi şbilo la şuhlofe kenşoye bu makthabzabno wa neşe du camo Suryoyo Othuroyo bi ruho du yawmano, kobın ağuno mqabıl di mwaxrutho, di gracyutho.  

Ba mamle dsimiste mahke cali mıcne du yawmo Tibeloyo da Neşe 8 Odor ucali ulsoyutho di methtaksonutho wi klayto di athto bu ağono umthoyo wi duktho dıklozım dmaydo ebe u mawdıc; U sebyono hiro di athto kıxolıq dactith hiro d’camo. Wu mahke cala fulhone dmaşele HNB bu zabno da 22 eşne di mşatsonuthayde u aydarbo mşatasle şutose la neşe b’Urifi, Suriya, Turabdin ubu Cıraq.  

Mahke’ste aydarbo HNB mtakasle neşe l’darğe u wolyotho mşahılfotho dmıdde duktho b’haqle frişe da haye kenşoye. Adyawma bıthır ma şoce dbıthır me falge d’yawmo sim Swed u b’Beljika turgome d‘8 Odor. Bu dumyano, şafico şato hreto mlitho d’hfitwotho dsimi me HNB bu athro ubi golutho bi cohnutho d‘8 Odor.