HNB bu Swed sımle turgomo bi Bethmardutho d’Bethnahrin d’Södertälje
SÖDERTÄLJE – U turgomo dsim 12 Odor leşan dmişalıt bahro calu ağuno da neşe dı britho, u cali aykanoyutho da neşe du camaydan wu ağuno dkobın, mıştawtıflele farsufe me mdinotho mşahılfe du Swed u d’Södertälje. Lu turgomano mcazamwole u Huyodo da Neşe d’Bethnahrin tarte neşe dkıtne ba gabe folitiqoye du Swed Nina Unesi mu Babo da Sosyaldemoqaratoye u Fahima Madusson mu Gabo d’Center.
U turgomo dımqadım mi mathlonitho d’HNB du Swed Oya Yılmaz Tahan. Mşayıl ma tarte neşe dkıtwın mathlonyotho da Gabe Swedoye dmahkın cal ruhaye u mın wolyotho kıtlın ba gabathe, ukul gabo mıqa kobe yuqro la zedqe da neşe, u mın kcone 8 Odor laşanaye.
Nina Unesi mahkela dme zabno yarixo bu Gabo da Sos y aldemoqratoye’yo, wu gabathe dkıtle fulhone mşahılfe laşan i şawyutho da tre ğınze. Elo bebzabno heş kito bsirwotho bi xasrathe. Cal 8 Odor mırla “a neşe hulın tacbo rabo laşan dhowe hawxa yawmo dilonoyo.”
Madusson’ste ba funoye dhula kalyo cali fliğutho dkito bgawe du cameydan, u bebzabno mahkela cala fulhone dıksoyım u gabeyda laşan di şawyutho da tre ğınze. Cal 8 Odor mırla “hano yawmo mqadşoyo la neşe dıbritho, wahnaste xıd camo klozım kul şato sayminale.”
İ mathlonitho du Mawtbo du Huyodo da Neşe d’Bethnahrin Ayfer Gabriyel sımla mamlo dmahkela calu ağuno dkobın a neşe du cameydan, u mamtela u mamla d’aydarbo kibe dhowe fulhono mşawtıfo bayn da şutose du cameydan wa neşe dkıtne ba gabe Siyasi u şutose di şultonutho. U turgomo kamıl ba droşe u şuwole dhawın bayn da hadire; dkıtwo beynothayye taşadarto mu Huyodo da Neşe Othuroye du Swed.