HNB frısle buyono cal Sohıdto Izla bi rişitho; Sohıdto İzla dcabiro bu kerwan da Sohde, hawyo bahro bu ağono di athto

BRITHO – U buyono du Mawtbo da Neşe d’Bethnahrin dıkmqadım bu şuroyo rişo basimo lu  rişono gawonoyo du Mawtbo Umthoyo d’Bethnahrin myaqro Mikhael Naim Hadodo, la hadomyotho ula noqufe d’HNB, la mothonoye uli iqartho di Sohıdto İzla Neriman Özgun Rucyo, komır; I hwartho Izla bi mşalutheyda drakıw u HNB, hula’ste yuqro rabo lu ağuno umthonoyo u ğensoyo u kıtwola diloyto dkull naqla obowa mrodo lu teqwiyo du sebyono di athto leşan i şawyutho.

HNB dkali calu makthabzabno dkıtyo sohudo li fedakariye di Sohıdto İzla bu haqlo umthonoyo u ğensoyo wu xıd athto u emo dhawyo mathlo l’ğalabe neşe du cameydan dmıştawtıfi lu ağuno umthonoyo udi athto, mırle; I hwartho Izla dkıtwa hdo ma mşatsonyotho d’HNB bu wahdo d’Urifi, hula’ste ağuno b’maşıqle ubı wahde mşahlıfe. Dlo grişutho mıdwola bu zabno du Rbico Caraboyo, ba fulhone b’Suriya u markawola cama hawrotho u Huyodo da Neşe Suryoye d’Suriya. Ba fulhone gawonoye di athto b’Turabdin ubu Cıraq, hawila dawro rabo u xıd ğenso d’athto bi haymonutho dkıtwola bu camo, bu athrayda mhalaqla dawse, dlo huwyo belhude emo li barthayda, elo li umtho kula.

U Mawtbo HNB komır; I hwartho mthabatla bu camleyda kull naqla dkıtwa masırto ba ağre di hawrutho uda Sohde. Bu siqumo 6 bu yarhano d’Odor da 2025 kınuflo i hwartheydan Sohıdto u kıcubro lu kervan da Sohde. U yarhano dkıtle ulsoyutho rabtho l’HNB cal dıkromız u 8 Odor wu mrodo leşan i şawyutho wa zedqe du ğenso, u yawmoyo’ste dban alfayo neşe dhwulın ruheye qurbono. Bu yarhano dıktocın i ulsoyuthathe, gıdmıstaqbıli a neşani i Sohdutho di hwartheydan’ste beynothaye.

Bu huthomo’ste HNB komır; Xıd Huyodo da Neşe d’Bethnahrin bu makthabzabno kımahkena cal neşe du cameydan xıd Ishtar, Shamiram, Zenobia; wu ucdo’ste gıdmahkena cali hwartheydan Izla dsaliqo lu darğo celoyo dkıtyo i Sohdutho myaqarto. I otho di hwarthaydan bıthır mucdo, ahna a noqufe d’HNB ba wahde kulle gıdtucninale u kulayna bu darbo di hwartho Izla’na. U kımmina a Sohde u bahro du darbaydan’ne! A sohde lıkmaythi! Tihe lu ağuno du Huyodo da Neshe d’Bethnahrin!