HNB kımdawım dmathkır 8 Odor bu athro ubi golutho

Turabdin: U Hudro da Neşe Suryoye b’Turkiya SURKADİM, kımdawım dımqadım tahınyotho la neşe Suryoye bı 8 Odor. A hadımyotho du Hudro da Neşe Suryoye b’Turkiya Surkadim, kımdawmi dmathkıri u yawmano da neşe bı hfitutho dilonoyto.  

Meqım kmo yawme, mbayanwolın a hadımyotho du Hudro tahrazto u sımwolın socurwotho la neşe di qritho d’Midın u dı Bsorino. Bu zabno di socuruthathe hawiwo droşo u mahkewo cali mıcne du yawmano u cali olsoyutho dmitathkır kul şato.   

Camathe’ste mqadamwo lkul athto u claymtho dkıtwa hadırto bi hfituthathe wardo xıd remzo di hubo, du haylo udi hirutho. Athmıl’ste u Hudro da Neşe Suryoye, laqi a neşe du camaydan d’Arkah, Kafro u Hah u mdaşni a neşe kul hdo wardo.  

Giessen: HNB m’akadle di athto Othuroyto Suryoyto hani ışne kımcaydo u yawmano d’8 Odor bi hfitwotho mşahılfotho u knufqo moro lu yawmano bi ruho ubu mrodo leşan dhowe demoqratoyutho u şawyutho bı britho. Bi ohnutho du yawmano’ste, maczımo i Sictho d’HNB b’Giessen l’taglitho dsimo mu gabo da Yaroqe bi mdito.

I mşalonitho d’HNB b’Giessen, sımla mamlo la hadire u kalyo cali ulsoyutho du nfoqo du moro lo yawmano d‘8 Odor, u maczamla a mtaybone, lu meeting dgısoyım HNB b’Giessen 11 bu yarhano bi şuctho da 15:30 bi mıştawtıfonutho d’neşe, mşale u folitiqore di mdito. Bcayni yawmo, gıdmisım hago d‘8 Odor b’Swisra ubu Swed u b’Beljika gıdmisım 12 bu yarhano d’Odor turgome.