HDP lo mbayanle mraşho li rişqutnutho

ANKARA – Bi maqırhonutho dhuwla athmıl i rişonitho zawgoyto di HDP Pervin Buldan mırla; U gabo Demoqratoyo da Came-HDP wa gabe dkıtne acma, lıgmbayni mraşho la guboye di rişqutnutho dgımisomi 14 bu yarho d’İyor. İ HDP dlo mbayaynla mraşho, kibe dxolıq qetro qum du rişqutno Turkoyo Erdoğan dminaqe l’dawro hreno.  

Bu knuşyo dsim lu tbocofroso, Buldan ftiho lo mawdacla en u huyodathe gıdsonıd u mraşho Kemal Kılıçdaroğlu, bıthır mi ytawto dhawiwolın camhıdode meqım kmo yawme. Buldan mırla; Ahna gıdmkamlina i mşaluthaydan mqabıl di mşalutho makthabzabnoyto dkıtlan mqabıl dha farsufo hkimo.  

İ HDP dkıtyo u gabo tlithoyo rabo bu parlamento d’Turkiya, u kıtle zıttır me 10 ba mo du snodo du camo bu athro kule u kmıhze xıd gabo dkibe dımbayın i netiçe da guboye di rişqutnutho. U mraşho Kılıçdaroğlu sımwole meqım 2 yawme socurutho li HDP bnişo dmoyıd u snodathe leşan dmığlıb u rişuqtno Erdoğan.   

Bi ytawtathe’ste a 2 gabe mawdacwolın, du şwolo da Kurdoye klozım dmışre bu parlamento d’Turkiya, kalın cala şwole dkito bu athro, mın klozım dmisım bıthır ma guboye uğer. Mqabıl di HDP’ste mabde fulhone leşan u sxorayde ma thome di asirutho dcami PKK. En dothe dmitaklıyo i HDP, kito droşo dgımaydo duktho ba guboyani mu gabo da Yaroqe Semoloye. U gabano bu yarho d’Teşrin u qamoyo mşahlafwole u remzo di othayde lhdo dıkdumyo li HDP.