HNB TURGOME YAWMO CNUFYO MQABIL Dİ ATHTO

U Mawtbo du Huyodo d’Neşe Bethnahrin kobe ulsoyutho rabtho lu yawmo Emwothoyo mqabıl du cnufyo dıkmisım cala neşe udu siqumano d’25 Teşrin u haroyo hawi yawmo remzono’yo li athto dnufqole moro u dmathkırole.

HNB dıkorıh kull şıkıl d’cnufyo dıkmisım cala neşe komır’ste; HNB nafıq lu darbano di hirutho du camaydan wu dilonoyith li şawyutho beyn da ğense ubu tarano’ste kıkorıh i dişutho u mwaxrutho dkito. Lfuth i mawdconutho dmatilan mu Mawtbo d’HNB, mawdıco’i tahrazto da hfitwotho dgısoyım adşato bu yawmo d’25 Teşrin u haroyo.

I tahraztathe’ste mşarewola heş 12 bu yarhano, bu workshop dsımwole HNB u frıco du Swed u klewo cali athto du camaydan, calu dawro dkıtla bu şuşoto du camaydan u grışwo u zuhoro calu yawmo Emwothoyo mqabıl du cnufyo dcali athto wi celtho dıkmitathkır kull şato.

Ramhıl’ste dkıtyo 25 bu yarho d’Teşrin u haroyo, Gıdmtayıb HNB b’Delmenhorst d’Almanya taklitho leşan dkurhi u cnufyano dıkmisım cala neşe. Ramhıl bi mdito d’Göppingen’ste gıdmtaybi a neşe du camaydan uda came hrene meeting leşan dgurşi u zuhoro calu yawmano.

26 bu yarhano’ste, HNB b’Swisra gıdmtayıb turgomo bu hudro d’Baden dgımitahwe mi maşlonitho du Huyodo-Ninve Özgun bi cohnutho du yawmano. Calathe HNB kısoyım qroyto lu camaydan u dilonoyith la neşe du camaydan dmıştawtıfi bi qroytayde dmitakle u cnufyo mqabıl da neşe b’britho.