HNB wi sictho da neşe di cito d’Madınho d’Othuroye mtayablın turgomo mşawtfo bi mditho d’Mainz, bi cohnutho du yawmo tibeloyo da neşe

MAINZ, Almanya – U salon di cito d’Madınho d’Othuroye di mditho d’Mainz bu athro d’Almanya, sımle baytoyutho l’turgomo mşawtfo du nuhoro dımtayable u Huyodo da Neşe d’Bethnahrin d’HNB cami sictho da neşe di cito d’Madınho d’Othuroye. 

U turgomano dhadırle 25 neşe mu camaydan di dmitho d’Maynz ud’ğer mdinotho Almanoyo, sim bu leşono Caraboyo, udrişo ebe i aykanoyutho gawonoyto du camaydan udilonoyith di athto Suryoyto Othuroyto dıkcayşo ba n’atharwotho d’Urifi ubu athro da n’abohotho bı Bethnahrin. Bu turgomano ste, drişi a’casqıwotho dıkcayşolın i athto du camaydan bi golutho, wu dawro dıkmıştacyole bu şroyo da qetre u casqıwothani bu darbo du şuşoto udu teqwiyo da timoyotho u prensibe di hiyoyutho umthoyto. A’malole grışlın ste u zuhoro calu ağuno dkobole i athto Suryoyto Othuroyto bu haqlo umthoyo wu ağunayda laşan di şawyutho camu gabro. 

Bebzabno, a’malole mahkelın cali mıcne ucalu sukolo d’8 Odor wi duktho dmıdla i athto Suryoyto Othuroyto b’gawıd du ağuno folitiqoyo u kenşoyo, u mın klozım dmisım laşan du quyomo di athto du camaydan udmisım u hurorayda ma qayde du kenşo udi dhıhniye mşawahrto. 

Bıthır mdımbayno i tahrazto da fulhone mşawtfe dıbqamuthayna, hew fsoso la neşe dhadiri bu turgomano d’obın a’hzayothaththe calu mede dkibe dmisım laşan du şuşoto di aykanoyutho di athto Suryoyto Othuroyto bu kenşo d’Urifi udilonoyith bu athro d’Almanya bu nfoqo mqabıl da casqıwotho dıklıqyolın bi golutho, u aydarbo kibe dmınfıq mqabıl du fşoro du camaydan b’gawıd du kenşo Urifoyo.