İ cito Angelikoyto bi mdito d’Melbourne d’Australia, gıdsaymo baytoyutho lu duxrono şatonoyo du Safyo dsim calu camaydan, cala Yawonoye u Armınoye

MELBOURNE, Awstralya – İ hasyutho di cito Angelikoyto d’Melbourne d’Australia fsıqla dsaymo adşato baytonutho lu duxrono şatonoyo da 110 eşne du qtolğenso mayiro dsımwola i mamlaxtho da Cuthmanoye calu camo Armınoyo, Yawnoyo u Suryoyo (Othuroyo-Oromoyo-Kaldoyo). U duxronano dgımisım yawme d’Huşabo 6 bu yarho d’Nison bi cito d’Mor Fetrus b’Melbourne, gıdmşare b’Qurobo Alohoyo leşan dmitathkıri a dıbhe du qtolğenso da 3 camani. 

U duxronano bebzabno kmısnıd mu İnisyatif mşawtıfo di Kinutho dıkmişakıl ma mathlone da gabe u şutose da 3 camani dmafiti bu Sayfo-awkith, u Komisyon Athronoyo dan Armınoye b’Australia, u Mawtbo da Hellen b’Australia wu Huyodo Othuroyo Tibeloyo-AUA b’Australia. İ cito Angelikoyto wu İnisyativ da gabe da 3 camani, mabdewolın meqım zabno fulhone mşawtıfe bi sbuthathe du qtolğenso.

Bıthır mi slutho, u Komisyon Athronoyo dan Armınoye b’Australia gıdmqadım şukono lu rişhsayo di cito dr Philip Freier calu dawro ulsoyo dhawila bıgawe du makthabzabnoyo ucalu snodo dkobo lu şeçoco uli mşaynutho da zedqe noşoye da came kulle. Bu duxronano’ste gıdmitathkıri a farsufe dhawilın dawro bu snodo da Mşihoye dım’athri mu qtolğenso di mamlaxtho Cuthmanoyto-xıd Edith May Glanville dcayişowa 1871 uhol 1966.

Lu duxronano’ste gıdhodır qoyume frişe mu parlamento di marcitho d’Victoria, rişone tawdithoye da 3 camani. Mşalo mu tukoso Yawnoye mqadamle tahınyotho lu snodano di cito udu camo b’Victoria leşan i şultonutho di marcithathe’ste dmawdıyo bu qtolğensano xıda marcıyotho hrene d’Australia. U mşalo Yawnoyo mırle’ste; Wolitho’yo cal kulayna dmathkırina hani dcayşi meqım menayna ula çilat hrene dgıdothın bu dactith, leşan dhowe mawdyonutho kamılto u dmitahwe iqoro la dıbhe kulle.