İ cito d’Mor Fetrus Faulus mzayahla i zqifutho dımşiho

Ba yawmothani di casqutho du kewo di Corona ğalabe ma citawotheydan u ğer citawotho sxirene u laybın mıstaqbıli u camo elo kımnasın bşıkılat mşahılfe dsaymi a zuyohe di şabthathe du haşo u da cede.

Hıdo ma citawothani i cito Suryoyto Ortodoksoyto d’Mor Fetrus u Faulus dkıtyo bi fnitho d’Norsborg dı Stockholm du Swed mzayahle i zqifutho dımşiho calu darbo du nawlo u be bzabno a mhaymıne ba radoyothathe qadiri fayti tahte du slibo qadişo.

Bi mawdconutho dmıdlan mu rişono du mawtbo di cito d’Mor Fetrus u Faulus Said Bışar mırle, ahna i sicto di cito camu kohneydean Xuroyo Şabo Elxuri drışlan aydarbo kiban dsaymina u dcamo mibarıx mu slibo lfuth a tadbire di Corona matina lu rınyano dsımlan u dmalaxle ğalabe tawo, athilan camo me kul duktho dı fayiti tahte du slibo u mbarxi mene.

Bışar bu mamle dacme mırle, ahna kul şato qariwo l’1800 farsufe hodriwo bu yawmano u faytiwo tahte du slibo mawxa adşato sımlan i hfituthathe bu şıkılano u najiho tawo.

İ cito Suryoyto Ortodoksoyto  du cameydan d’Mor Fetrus u Faulus bıthır mi slutho du zuyoho di zqifutho d’Mşiho mawfaqlın uslibo larwal u mahıtlın cal xaymo da radoyıtho kibın fayti me tahte wu camo kibe mibarıx mene.

Cam gabe du camo foyatwo ba radoyotho me tahte du Slibo mişmıcwo a qole du yawmano me feme da şamoşe  şamışyotho.

U zuyohano dsim bi rişonutho du kohno di cito d’Mor Fetrus u Faulus Xuroyo Şabo Elxuri grışwole u zuhoro du tboco froso qlimoyo dıfrısle u mahkele calu zuyohano.

Ba yawmothani di casqutho kmahwe u cameydan dkıtyo masro ba maşılmonwotho u bi mardutheyde mawxa kımnase lfuth a qonune dkito dı xolıq mkono dmalıx i mardutheyde wa cadateyde.

Mathlo lu medano u mede dsımla i cito d’Mor Fetrus Faulus d’Norşborg d’Stockholm du Swedyo.