İ cito d’Mor Tuma da Suryoye Qatholiqoye di mditho d’Mawsal bu Ciraq, kamıl ucdo u maşıqlo trayono du bnoyayda

MAWSAL, Ciraq – U kohno di cito d’Mor Tuma da Suryoye Qatholiqoye di mditho d’Mawsal qaşişo Biyos Caffas, sımle qroyto la kohne da citotho mşahılfe d’Mawsal ula n’abne da marciyotho kulle di mditho, dmıştawtıfi li slutho du qurobo alohoyo dgımtayable bi citayde cal dkamıl u maşıqlo trayono du bnoyayda.

Qaşişo Biyos bi maqırhonutho dıfrısle bi dafo kenşoyto di cito d’Mor Tuma, grışle u zuhoro cali tahrazto di hfituthathe i ruhonoyto dgıdmitaybo yawme d’Şabtho dıbqamuthayna dıknofıl 30 bu yarhano d’Nison.

İ hfituthathe gdımşaryo bi şuctho da 10 dsafrayto bı mawdconutho ubı kroxo dgıdhowe b’gawıd di cito d’Mor Tuma laşan dmıkle calu mede dkamıl u bnoyayde lfuth u maşıqlo trayono. Bıthır mathe bi şuctho da 10 u falge dsafrayto, gdımşaryo i slutho du qerowo alohoyo dıkmıntır dmıfrıs hayo bi dafo du facebook di cito d’Mor Tuma.

İ tahraztathe ste gıdmıhthomo bıhfitwotho di feshutho dgıdmitaybi bi dayro d’Mor Bahnam d’Ninwe, bi mıştawtfonutho da mhaymne kulle da marciyotho d’Mawsal.

Bi şato dşaficina da 2021 bıthır mıdşafıcwo şwac ışne calu kboşo d’Mawsal mu tukoso marıhbono dı Dacış, dıqwole m’hatho u noquşo di cito d’Mor Tuma da Suryoye Qatholiqoye. U noquşano du yıqrayde 285 kilograme yo, nqılwo mi mditho d’Bayrut l’Mawsal, u sımwo u futohayde mu qaşişo biyos Caffas ubi mıştawtfonutho d’mowat mu camaydan.