İ dacwa d’Olof Palme mqapto bıthır mıd mowdıc u qatoleyde manyo

I sbutho du qefoyo du qatolo du rişwazire catiqo du Swed Olof Palme sxiro bi mawdconutho dıfrısle u mqimdayono krister Petterson adyoma bu knuşyo gelyonoroyo dhule bıthır me 34 ışne.

 Bi mawdconutho dhule u mqimdayono mırle mıthabatlan du qatolo Stig Engström awste dıkmidıc u gabro d’Skandia, elo bıthır mıd kıtyo mitho layban mdawmina u bethdino.

 Bi şato da 1968 qtılwo u rişwazire du Swed Olof Palme bu zabno dkıtwe dacoro mi sinema hiye i bathzawgeyde Lizbet Palme bu malxo bi şuqo d’Stockholm b’Sveavegen.

Mu zabnawo hul adyoma ba alfowat dı banynoşo sim mamlo acmaye u mşayıl mın hzelın bu lalyawo u mın kudci bhaq di sbuthathe bayn da farsufani fayıtwo ışme dıha dmitawmarwole u gabro d’Skandia awste bu Swedi Skandiamanen, elo lı grışwole u zuhoro da pwelıs u damqimdayone di tarmitho du qatlo d’Olof Palme.

U farsufano Stig Engström mamte bahıs didhe elo lo naqa kıle cala tebe u mamle dsoyamwo qulnaqa b’ğalabe dukotho u farsufe dmıjğılwo acmaye. Elo adyoma u mqimdayono di sbutho du qatlo d’Olof Palme Krister Peterson mawdacle dımatın li qanaca du farsufanoyo u qatolo d’Olof Palme dıqtil meqım b’34 ışne.

Stig Enström mwayacwole a hayeyde bi şato da 2000 mawxa u mqimdayono bi mawdconutho dhule adyoma mırle bıthır mıd u farsufano latyo bahaye layban mdawmina isbuthathe, u bıthır mıd matina li qanaca dkıtyo hiye u qatolo gıdsuxrina isbuthathe hul colam.

Bi sbuthate u abro d’OLof Palme Mort Palme mırle kmıtyaqano lu mqimdayono dkıtyo u farsufano u qatolo.

Mede hrene dıgrışle u zuhoro bi maqırhonutho dhule u mqimdayono mırle u qatlano farsufoyith sim layto gurub aw xeyr mede boıthre di sbuthathe.

Bhaq di sbuthathe du qatlo d’OLof Palme hawi droşe u mamle sagiye dkıtne rşime ba tboce frose gawonoye.