26/04/2021

İ dafo d’Al Monitor frısla tebo cali sbutho d’Dayroyo Aho Bilecen

İ dafo d’al Monitor, frısle tebo calu fusqono dmıdle bethdino Turkoyo bhaq du dayroyo di cito Suryoyto Orthodoksoyto Aho Bilecen.

Bi mimarthathe bşıkıl rwiho rizi a dacwat wa thome dımqadmi mqabıl du camaydan, bnişo dmaxle a dukothayde a şerşoye.

‘İ dacwa du bethdino mqabıl du dayroyo, mamtela lbole di qalılto Suryoyto b’Turkiya, a rdufye, a hçome wa hawbe dsimi mqabıl dida’ ba melani kımşaryo i mimartho dfriso b’al Monitor calu jğuşyo d’xlıqla i dacwa du dayroyo Aho beyn du camaydan u mawdıc; Ğalabe Suryoye lıkmıjğoli ğalabe bi sbuthathe, u hathe kiba duthyo mi zuctho dheş kito b’lebe du camo.

Bi mimarthathe mahke cali sbutho du dayroyo di dayro d’Mor Yahkub d’Qarno, a thome lo trise wu bethdino dsim bhaq dide u mıqa u şwolano trele ğamo beyn du camaydan, dkull naqla kıfoyış bu falgo da taxtuşe uda qrobe. Bebzabno bi mimartho mahke cali dayro d’Mor Gabriel ucala citotho du camaydan dmahrıwiwo bu zabno du Sayfo dan 1915 dsımla i mamlaxtho da Cuthmanoye acle.

al Monitor kımawdıc, a dayre wa citotho b’Turabdin kull naqla a tarcathe ftihe’ne lkull noşo uholucdo’ste, Turkiya lo hçımla bu dumyano cal rişone tawdithoye da Mşihoye u d’tuhmole bi marhıbonutho. Bebzabno bi mimarthathe rizi’ste a hçome hrene dsimi calu camaydan u aydarbo jbir dmaxle a dukothayde u nafıq li golutho.

Elo camathe’ste, mahke cala kampanyat wa hfitwotho dsimi b’athrawotho frişe d’Urifi leşan u terfiyo du dayroyo Aho u dmınfıq moro lu camo, la citotho u dayre makthabzabnoye dkıtlın a Suryoye b’Turabdin. Ba hfitwothani’ste tlib mu kenşo Emwothoyo dsaymi hboso cal Turkiya dmaklıyo a hçomayda calu camo Suryoyo ucala remzayde a tawdithoye.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…