08/02/2020

İ dafo d’France 24 frısla tahrazto cali aykanoyutho du cameydan dıkcoyuş bu garbay madenho d’Suriya

İ dafo Franşoyto-France 24, frısla tahrazto cali aykanoyutho du camaydan bu garbay madınho d’Suriya u mawdacla, da Mşihoyani kıcayşi bi zuctho bu zabno dkıtne a hayle Turkoye wa ğrobe marhıbone d’Dacış heş hfite bu qlimo.

 Bi tahraztathe dfriso bu leşono Caraboyo u Englişoyo, bşıkıl rwiho mahke cala qetre ucala casqotho dıkloqe u camaydan wa Armınoye mcal fothe da hçome da hayle kaboşe d’Turkiya uda krılyotho da ğrobe marhıbone d’Dacış.

Bıthır mıd a gelyunore Franşoye Chris Huby u Matthieu Delmas daciri mi socurutho dsımwolın lu garbay madınho d’Suriya, mtayablın tahrazto d’17 qatinotho, cali aykanoyutho du camaydan, calu qento di ithutho Mşihoyto b’Suriya, u kboşo da hayle Turkoye uda marhıbonathe wu husrono dhiw la dukotho makthabzabnoye du camaydan b’Suriya.

Bi tahraztathe dfriso bi dafo d’France 24, mawdıc da Mşihoye du garbay madınho d’Suriya, adyawma kıcayşi bı qento rabo umu yarho d’Teşrin u qamoyo da 2019, fayış u camaydan bu falgo da taxtuşe beyn da Turkoye uda hayle Kurdoye wu camani’ste u qento wu gzomo da krılyotho da marhıbone d’Dacış. A Mşihoye kıcayşi yawmoyith bi zuctho du htofo uda hçome.

A gelyunore mahkelın calu groşo da folhe Amerikoye wu bıthır a hçome dmabdela Turkiya wa marhıbonayda cala hayle di YPG u aydarbo mafıtte dukotho frişe du qlimano-dkıtwın du camaydan di fnitho du Xabur, lu duyoqathe. Bi tahraztathe sim maqıblonutho camu rişono du gabo du Huyodo Suryoyo Sanharib Barsoum u dmahkele cali aykanoyutho du camaydan.

Bebzabno griş u zuhoro calu mrodo dkobın a Mharbone du Mawtbo Folhoyo Suryoyo cama hayle d’SDF, i Sohdutho da ağoniste d’MFS. Camathe’ste kle cal aydarbo Amerika wa hayle du macırbo trelın a haylani lhudayde mqabıl da hçomani, dhawın celtho l’golutho hreto rabtho mu qlimo. Elo camgabe dımgalwele ğalabe Mşihoye me Suriya, kito’ste mınyono rabo dfsıqle dfoyış bu athrayde u dobe ağuno leşan dımhafıd i ithuthayde bu athro.

Check Also

U parlamento d’Australia tlıble mi şultonutho du Iraq dımşatso şultono yothoyo lu camaydan dıkhoye bi daşto d’Ninwe

U parlamento federaloyo d’Australia, bıha femo tlıble mi şultonutho du Iraq dımşatso şulto…