15/05/2022

İ dafo İndependent Catholic News frışla tebo calu mgabyo di qritho d’Baradaş b’Nuhadra

‘A Mşihoye kmımsoki, cal dıkmnasın dımdafci an arcothathe mu kboşo’ a melani du tebo dfrısla i dafo İndependent Catholik News’ne. Bu tebano dfris, griş u zuhoro calu msoko dan abne du camaydan di qritho d’Baradaş b’Nuhadra bu garbyo du Cıraq, cal dhın Kurdoye abici dmahti ido calan arcotho da comure Mşihoye.

15/05/2022

İ dafo İndependent Catholic News, frışla duktho bu frosayda calu mgabyo di qritho d’Baradaş dkıtyo b’Sarsıng b’Nuhadra dkıtyo mu camaydan u Othuroyo wu qetro d’xlıqlın a Kurdoye bi sbutho dan arcotho di qritho. Bi dafathe mawdıc du mgabyo Zaya Minas u farsufo hreno mu camaydan James Zaya, msikiwo 11 bu yarhano bıthır mıd hın Kurdoye di KDP mnaselın dkıbşi falqo d’arco da comure di qritho.

Bu zabno da comure d’Baradaş mahwelın hfuxyo u dımnaselın dımhafdi a mulkonathe, u Asayış di KDP mhaqarle u msıkle u mgabyo Minas wu Zaya dıkmsawarwo i sbuthathe. U qetrano dmabde buhone acle, xlıqwole hfuxye beyn du camo uda folitiqore Mşihoye wu rişono Komisyon da zedqe noşoye du qlimo d’Kurdistan sımwole socurutho li qritho leşan dımcaqıb u şwolo.

Camathe’ste u mşatsono du tukoso da Mşihoye b’britho-Christian Solidarity Worldwide Mervyn Thomas mawdacle, dımabdelın buhone bi sbuthathe u sımlın qroyto li şultonutho d’Arbil, baroyo dmarfıyo a 2 Mşihoye u dım’akdo, dgıtulbo hşowo ma farsufe dıkbışlın an arcotho da Mşihoye u dım’amno a zedqe şawye, a zedqe di hirutho tawdithoyto uda mulkone du camo Mşihoyo.

Bebzabno bıthır ma hfuxye dmahwın ma şutose du camaydaan bi golutho’ste; beynothaye ESU, marfe u mgabyo u gelyunoro James Zaya. Hathe latyo inaqla qamayto dıkmitahıt ido calan arcotho du camaydan bu Cıraq, elo a mşale frişe du athro’ste kull naqla kımdacın dkobın ulsoyutho rabtho lu camaydan bu athro.