19/05/2022

I hadomutho du Swed u Finland lu NATO snido kamiloyith me Biden

İ hadomutho du Swed u d’Finland lu huyodo du NATO, snido kamiloyith mu rişono d’Amerika Joe Biden xıd klayto mqabıl du qrobo dmabdela Rusya b’Ukraina. Woşington m’akadlaste, gıdhuwın mahise mqabıl dkull gzomo dgımisım cala tre athrawothani. Elo Turkiya kımahto şartat qum d’Amerika, leşan dım’aydo i hadomutho du Swed u d’Finland lu NATO.

19/05/2022

U rişono d’Amerika Joe Biden m’akadle u snodayde u kamilo li hadomutho du Swed u d’Finland lu huyodo du NATO. Bu mamlo dsımle Biden mırle; Ono b’hamimutho ubı şıkıl qawyo, kısonadno i dawsathe i makthabzabnoyto di muraçaca du Swed u d’Finland lu NATO u kıtli sabro, dcal qariwo dfulhina camhıdode bnişo dmaqwena u huyodano b’surhobo.

Camgabe d’Biden, u notarozo gawonoyo du NATO Jens Stoltenberg’ste mawdacle i thnihuthayde li dawsathe dımhalaqe a 2 athrawotho d’Skandinavia-dilonoyith d’Finland, dkıtla thumo d’1.340 kilometre yarixo cam Rusya. Elo bu zabno dıkmitahwe thnihutho cali muraçacathe, u rişqutno d’Turkiya rfıdle athmıl i hadomuthathe du Swed u d’Finland u mawdacle, dlıkm’aydila.
Elo bu mamlo dhawile u waziro di baroyutho d’Turkiya Mevlut Çavuşuğlu camu bar’amnayde d’Amerika Antoni Blinken huwle hzayto frışto. U waziro Turkoyo  bi qamayto m’akadle dıksundi du NATO dhowele siyase d’tarco ftiho lu Swed u Finland en dubci dcubri lu huyodo u bıthır, mkararle a talabe d’Erdoğan.

Çavuşoğlu mkararle i sbutho di baytoyutho du Swed u d’Finland li marhıbonutho u mqabıl du cborathe lu NATO, tlıble dmitaqımi a tedbire du zebono du zayno l’Turkiya. Çavuşoğlu mırle; Lıkmitaqbıl d’athro hadomo-dmahıt tedbire du zayno cal hadomo hreno du huyodo. Cali hadomuthathe, Finland mawdacla dlo kubco dsaymo baytoyutho l’zayne nukleer uloste qentrune du NATO.

U waziro du sutoro du Swed dkıtyo ucdo b’Pentagon leşan a droşe du şudoye di mşaynutho dhuwlalın Amerika, meqım mıd u NATO dmaqbıl i muraçacathe. Elo holucdo’ste heş lo mde qyomo ruşmoyo bi sbuthathe elo mawdıc, d’Amerika kibe dhowla ithutho folhoyto ba thume du yamo du Swed. Bu zabno da droşani’ste u huyodo d’G7 hawile knuşyo b’Bruksel u m’ayade i muraçaca da 2 athrawotho hathe.

A wazire di baroyutho d’G7 kalın’ste cali hadomutho d’Ukraina bu Huyodo d’Urifi ubi sbuthathe Almanya m’akadla, d’Ukraina klozım dşufco bu maşıqlo di hadomutho xıda athrawotho hrene kulle. Dilonoyith bu knuşyano, kle cala şuşote haroye d’Ukraina, cali butçe du athro, calu snodo du bnoyo u hethotho du athro wu Yaban’ste m’akadle, dgımazidi u snodathe l’Kiyev.