I KCK mawdacla u siqume du teslimo da zayne do PKK

QANDIL — U malolo du huyodo da kenşe d’Kurdistan di KCK dkıtyo u gefo folitiqoyo du gabo di PKK Zakros Hiwa, mawdacle du grub qamoyo da mharbone di PKK dıknofıq u menyonaththe bayn 20 uhul 30 farsufe, gıdmasılmi u zaynaththe bi hiğmonutho di Slemaniye bu qlimo d’Kurdistan du Ciraq bu siqumo bayn d’10 u 12 bu yarhano dı Tamız. 

Zakros Hiwa bi maqırhonutho dhule lu ajans da tebe d’AP, mawdacle da mharbone di PKK gıdmasılmi u zaynaththe bi mdabronutho dı tukose du kenşo mdinoyo u tarafe hrene, u mathkarle ste du menyono da mharbone heş lımbayın, elo kibe dhowe bayn d’20 uhul 30 mharbone. 

Bebzabno, Zakros Hiwa mawdacle du gabo di PKK lıgıdhowele mkone dımhalıq dawsat rabtır mawxa bi sbutho du teslimo du zayno, in dlımitaqım u izilasyon dmahıt cal Cabdalla Öçalan dkıtyo bu hbuşyo d’İmrali, udmimıd tedbire qonunoye, nomusoye u folitiqoye mi xasra dı Turkiya laşan dmisım u garanti da mharbone dıktorın mu stratiji du ağuno folhoyo kibın dmıştawtıfi lu maşıqlo folitiqoyo demoqratoyo dı Turkiya. 

M’gabo hreno, mşalo mi şultonutho du qlimo d’Kurdistan dlımaglele cali hiyoyuthayde, bi maqırhonutho dhule l’AP, mawdacle dımte l’awyutho bayn di PKK u Trukiya dmitahru b’şıkıl remzonoyo hın ma zayne xayife du Gerella bi mıştawtfonutho d’mathlone mi şultonutho d’Arbil, bnişo dmişadır egartho di mşaynutho l’Anqara.