İ maqırhonutho d’Charles Michel maqharla amşale d’Turkiya

A hfuxye wa maqırhonwotho mqabıl du rişqutno d’Turkiya Erdoğan, yawmo cal yawmo kzaydi. Bu zabno haroyano u rişono du parlamento d’Urifi wu rişwazire d’Austurya, mahwelın hfuxyo mqabıl da zawce dıkmaşyo Turkiya bu yamo mescoyo.

 U rişwazire d’Austurya Sebastian Kurz bi maqırhonuthayde mırle: Erdoğan kmıstacmıl abnaymothoye d’Turkiya dkıtne b’Urifi, leşan u yuthronayde.

 Bıthır mıd u rişqutno d’Fransa Emannuel Macron kımdawım i klaytayde mqabıl da zawce d’Turkiya, ucdoste u rişono du parlamento d’Urifi Charles Michel huwle maqırhonutho, dıtrela 2 ma mşale di şultonutho d’Ankara dmıqhori ğalabe. Bi maqırhonuthayde Michel mırle; Ahna klozım dımaşena siyase b’2 darbone cam Turkiya naqlat dmahwena i hatro wu naqlat dobinale gezoro. Awkith naqlat naşifo dmalxina acma u naqlatste rakixo dılo amşale d’Turkiya laybın dfuhmilan.

U rişono du parlamento d’Urifi bi maqırhonutheyde grışle u zuhoro cala zawce dıksaymo Turkiya mqabıl dan athrawotho hadome du Huyodo d’Urifi u Yawnan u di gozarto d’Qufrus da Rum. Me gabo hreno u rişwazire d’Austurya Sebastian Kurz kımdawım ba maqırhonwothayde mqabıl du rişqutno Turkoyo Erdoğan.

Bi maqırhonutho harayto dhuwle Kurz mırle; Erdoğan idicoyo dıkmıstacmıl a galwoye wa bnaymothoye d’Turkiya dkıtne banathrawotho d’Urifi, leşan u yuthronayde. Mawxa ahna klozım dhowina mahise, u dlothina li hile ula teştecınye dkobıc dsoyım.

 Bıthır ma maqırhonwothani amşale wa wazire du rişqutno Turkoyo mşarelın  dobın funoyo la maqırhonwotho dkothe me Urifi mqabıl d’Turkiya. Kmahwe Turkiya bu zabno haroyano, belhude a wazire wa mşale d’AKP u di şultonutho kımalhıqi dobın funoyo la sturye ula maqırhonwotho dkothe me Urifi cala hawbe u dyoşe dıksaymo Turkiya mqabıl da athrawotho şbobe dkıtla uda came dıkhoyın bıgawa.