28/07/2020

İ mimartho d’Folitiqoro Bethkınne grışla u zuhoro dkıtwa cali sbutho d’Ayasofia

Meqım  me 105 ışne i mamlaxtho Cuthmanoyto maqımla qtolğenso sayfo calu camo Suryoyo-Othuroyo wa mşihoye hrene, bi slutho dsimo b’Ayasofia dımşahılfo l’masığdo u rişono di tawditho tcınle u sayfo salıq lu culyo u msalele mqabıl dı caynothe dıbritho komır u folitiqoro Aday Bethkınne bi mimartho dıkthule bu dafo du facebook dkıtle, dıgraşla u zuhoro da qaroye d’zıttır me 1400 farsufe fliğolın.

Bi şato da 1915’we inaqa di mamlaxtho Cuthmanoyto b’Turkiya qtılwolın mınyono rabo ma mşihoye dkıtwolın nişo du qşoco, bele meqım 105 ışne nhırlın a gabre u marıslın buğre aclaye sımlın tajcawuz cala neşe u qtiline, wa nacime dlımawlıdiwo dkıtweyne bkarse da emothathe, ya gıdhowuto maşılmone yaste gıdmıqtolutu ımiwo a folhe da Turkoye wa milişyat da kurdoye. Hani dı qadiri mahızmi mahzamlın wahrene qtili.

Kule gıdmıqtoliwo bu sayfo. Zıttır me 2 mılyune qtili u nhiri.

U yawmo dımşahılfo Ayasofia l’Masığdo ba qtiru bi zoriye ba mo alfowat mhawarlı Alllahu Akbar wu malla dkıtwe u waziro di tawditho kıtwo b’idothe Sayfo. Fayıt zıttır me 100 ışne calu qatlo da came mşihoye heş Turkiya lı mawdela u lo mhalaqla dawse, bcayni meho kımşahılfi i yortutho da mşihoye la masığde u mcare, u furşono dkito ucdo layto mşihoye dqutli komır u folitiqoro Aday Bethkınne me Norsborg du Swed.

Bethkinne bi mimartathe dı zıtır me 1400 farsufe mfalğolın bu facebok komır. U med mahişono da sıbwothani kowın mqabıl d’caynothe dıbritho u lıksaymi mede, tam bhefxo du medano kmaxiri ba milyare d’zuze xıd snodo l’Turkiya.

Bethkınne ksoyuım sturyo a athrawotho d’Urifi u dilonoyith komır u medano kule kowe u rişwazire du Swed Stefan Löven wi wazırto di baroyutho ksıkti u lı kımi mede.

Mede kobacno dmamtene lu bolo u camo Suryoyo-Othuroyo-Kaldoyo-Oromoyo cama came mşihoye u mınyono rabo du athro d’Turkiyaweyne, u ocdo u camo mbarbızoyo bı britho dılo athro. Bu huthomo Bethkıne komır ucdo kmahisina du qatrano rahuqoyo menan, elo ramhıl u tahdidano kibe  howe quma tarceydan bu Swed.