I mocsutho (gumruk) dmahitle Donald Trump cal Urifi mafit la haye

WOSHINGTON/BRUKSEL – U rişono d’Amerika Donald Trump, mbayanwole meqım zabno dmazıd u gumruk calu Huyodo d’Urifi l’25 ba mo, şafıc ucdo u fusqonano la haye. İ mocsutho dmahıtla Amerika, calu fulad ucalu aluminium d’Urifi’yo wu xıd funoyo mqabıl d’Trump, u Huyodo d’Urifi’ste mahıtle mocsutho/gumruk bcayni timo cal Woşington.

İ mocsutho d’Urifi cal Amerika, kıhobış bıgawe; beynothaye u alkohol, a sfinotho, darıxyotho du motor dıkmşadro Amerika lan athrawotho hadome du Huyodo. U gumrukano d’Amerika gıdm’athır ğalabe mrimono cala şırak Urifoye kulle u hatta Swedoye. Calathe u Komisyon d’Urifi mbayanle tedbire leşan u sutoro da şırak, da more da şırak uda mdinoye d’Urifi.

Gawonoyith 26 milyare euro mu eksport du Huyodo d’Urifi gıdmi’athır mu gumrukano d’Amerika u lfuth u Huyodo d’Urifi, hano kımşakıl 5 ba mo du eksport gawonoyo du Huyodo l’Amerika. Wa şırak Amerikoye dıkzawni mal mu Huyodo, gıdmıjbori dobın 6 milyare euro ubu dumyano, gıdmadcır u Urifi u gumruk dmahıtwole ba 2018 u 2020 cal Amerika.

Cal du gumruk dmahıtla Amerika calu Huyodo qşeytır’yo, gıdmbayno Bruksel cal qariwo tedbire hathe-leşan dhowın bcayni timo d’Amerika u kmıntır dmitahti bu yarho d’Nison. Me gabo hreno athmıl, mıstacmıl mele harufe beyn Amerika u Kanada, bıthır mıd Trump gzımle dmahıt gumruk d’50 ba mo calu fulad d’Kanada. Elo u zuhorano d’Trump bıthır griş naqla hreto, cal di marcitho d’Ontario d’Kanada maqbela dmaklıyo u şedoro du kahrobo l’milyon u falge d’bote u şırak Amerikoye dkıtne ba marcıyotho şbobe l’Kanada-New York, Michigan u Minnesota.