İ qale beyn du Amerika u Sin heş kımdawmo

İ qale bayn du Sin u d’Amerika cali rişonutho dıbritho b’şıklat mşahılfe kımdawmo.

Camgabıd du mahwo şqolo bi sbutho du virus d’Corona, athmılste u mawtbo di mşaynutho d’Emwotho Mhaydotho lıqadır dımbayın hın ma fusqone ulsoye bi netije di qale dkımdawmo bayn du Sin u d’Amerika.

Bi ytawto dımtayable athmıl u mawtbo di mşaynutho d’Ewmotho Mhaydotho, magle cali fotho di mwatyutho udi qale dkito bayn du Sin u d’Amerika cali rişonutho dıbritho. Bıthır mıdroşe dımdawamlın hedor dıtre yarhe, athmıl u mawtbo di mşaynutho lıqadır dmote l’awyutho cali rmoyto dıksındo i qroyto dsımwole u notarrozo gawonoyo d’Emwotho Mhaydotho Antonyo Guteres dmisım şalyuthzayno bı britho kula, bnişo dqıdro i noşutho dmahto u yuqrayda calu kewo du virus d’Corona.

Athmıl u mawtbo di mşaynutho lıqadır dmafıt irmoyto dımqadmo la haye, mi celtho da qetre dnafıq bayn du Sin dımakadle dıklozım u tukoso tibeloyo du hulmono dmitathkır b’gawıd di rmoyto u Amerika dırfıdla dmitathkır ışmıd du tukosano bi rmoyto. Ba mamle dsimi Amerika thımla u tukoso tibeloyo du hulmono dkımqadım b’furşono lu hşowo du Sin, ube bzabno lımakşarle bi mdabronutho du kriz d’Corona.

U rişono du grub da krize emwothoye Rob Mali, bi maqırhonutho dhule sımle sturyo u qedomo dmahwela Amerika wu Sin bu nfoqo mqabıl du virus d’Covid-19, u mırle “kmahwe lo Waşington uloste Pekin kıtlın u haylo aw hadirene dmahwın rişonutho dıbritho b’gawıd dı kriz tibeloyo”.

Camgabıdathe, hawi athmıl jğuşyo rabo bayn Amerika wu Sin bi sbutho da mcadrınwotho noşoye dıkmiqadmi l’Suriya. İ mathlonitho d’Waşington bu mawtbo di mşaynutho d’Emwotho Mhaydotho Kily Kraft bu mamlo dsımla tlıbla mu Sin dımthabıt i rişonuthayde lıbritho ba fulhone dıkmisomi mqabıl d’Corona, udsonıd rmoyto dkobe fsoso l’Emwotho Mhaydotho dımşadro mcadronwotho noşoye l’Suriya bu darbo da nuqazyotho da thume. Bu funoyo dhule u mathlono du Sin Tşang Jon tlıble m’Amerika dımbatlo ateştıcınyayda udmahto u yuqro da fulhonayda laşan dmitaxılsi a’haye da bnaynoşo, ulo dmahto a’hawbe bıqdolıd d’ğer athrawotho.

Me gabo hreno, u mathlono d’Rusya Vasili Nipinzya bu mamlo dsımle tlıble m’Amerika umu Sin dlımvayci zabno bu mahwo şqolo dbayn dıhdode, u makadle dıklozım dhowe methcadronutho cam Darmsuq bi sbutho du tefito da mcadrınwotho noşoye l’Suriya.