03/03/2021

İ rişathizgadto d’Amerika tlıbla mu rejim d’Suriya dobe mawdconutho cali aykanoyutho da hbişoye

İ rişathizgadto d’Amerika b’Emwotho Mhaydotho, tlıbla mu rejim d’Suriya dobe mawdconutho cali aykanoyutho da hbişoye kule u dmadcıro a şlade da mithe la yaqrothathe.

 İ rişathizgadto Linda Thomas Greenfield mırla; hol 14 alfo hbişoye mafiti ba teşniqe uba casro alfayo hrene mvayci u noşo lıkodıc haykone.

İdicoyo du rejim du rişathro d’Suriya Başar al Asad, msıkle u hbışle ban alfayo dıbnaynoşo dıktulbi a zedqathe u dkıtne saqıbloye di siyasayde. İsbuthatheste, grışla i rişathizgadto d’Amerika b’Emwotho Mhaydotho Linda Thomas-Greenfield u zuhoro acla bu mamlo dsımle bu knuşyo dsim cala zedqe noşoye bu Mawtbo Gawonoyo d’Emwotho Mhaydotho.

Bu mamlo dsımla Greenfield mawdacla du rejim d’al Asad, klozım dobe mawdconutho ruşmoyto cali aykanoyutho da hbişoye u dmadcır a şlade da mithe la yaqrothathe. Bu knuşyano’ste a 193 hadome du Mawtbo, şamici la teşcıyotho da farsufe dmaxlase ma hbuşyani u tlib da mşale du rejim dobın u hşowathe. Elo kull naqla dtlib u hşowano me Suriya, makle mu veto dmıstacmela Rusya.

Thomas-Greenfield mırla; Kmitıftakır dkito hol 14 alfo msike ba hbuşye wa yasirani yawmoyith, kmitafıti ba teşniqe uban alfayo dhrene, kmivayci dlo xabro. Kito neşe, tloye, sobe, osye, falohe da tukose di mcadronutho, gelyunore u farsufe dlatte hawbe, bıgawe da hbuşyani u lıkmisamlın bethdino kino.

İ rişathizgadto mırla’ste; Calathe kıtulbina mu rejim, bşıkıl ruşmoyo dmawdıc u zabno, i duktho wi celtho du mawto du hbişoyo u baroyo dmitadcır bıthır lu ahılayde. Bebzabno kıkurhina u sxoro da thume ba 2020 la tukose dıknuqli mcadronutho noşoyto lu camo sniqoyo. Athi u zabno dkulayna dmotina l’şroyo folitiqoyo lu krizano u belhude hawxa, kibe dhowe şlomo u mşaynutho bu athro.

Bu qrobano d’Suriya dıkmdawım ma 2011, qtil hol 387 alfo bnaynoşo u htif ba casro alfayo beynothaye a 2 hsayo d’Holob ba 2013-Mor Ğriğoriys Yuhanun Abrohom u Mor Bulus al Yazıji, wu rişono di Knuşto Marduthoyto Suryoyto d’Suriya Sacid Malke dımsıkwo 12 bu yarho d’Ob da 2013 ma hayle du rejim d’Suriya.

Check Also

U parlamento d’Australia tlıble mi şultonutho du Iraq dımşatso şultono yothoyo lu camaydan dıkhoye bi daşto d’Ninwe

U parlamento federaloyo d’Australia, bıha femo tlıble mi şultonutho du Iraq dımşatso şulto…