22/07/2021

I rişonutho zawgoyto du Mawtbo di qastra di Dırbasiye d’Suriya mawdacla du futoho di nuqazto du thumo d’Bab Alhawa kımcadır a marhıbone du tukoso d’Tahrir Alşam

I rişonutho zawgoyto du Mawtbo di qastra di Dırbasiye d’Suriya, mawdacla du futoho di nuqazto du thumo d’Bab Alhawa, belhude kımcadır a marhıbone du tukoso d’Tahrir Alşam, wu medano gıdmathır mrimono cala bnaymothoye d’Suriya.

U rişono zawgoyo du Mawtbo Rustom Bakır, bi maqırhonutho dhule lu tboco froso mawdacleste du sxoro di nuqazto d’Tel Koçer fusqono dlatyo lu yuthrono di noşutho.

09 bu yarhano, u Mawtbo di Mşaynutho d’Emwotho Mhaydotho fsıqwole dmitacbıri a mcadrınwotho noşoye belhude bu thumo d’Bab Alhawa dkıtyo kbışto ma marhıbone d’Tahrir Alşam. Bebzabno, u Mawtbo di Mşaynutho bu quwolo dsımwole fsıqwole’ste dmısxır u thumo d’Tel Koçer dkıtyo beyn da fenyotho di Mdabronutho yothoyto udu garbiyo du Iraq.

Cali sbuthathe, u rişono zawgoyo du Mawtbo di Dırbasiye Rustom Bakır bi maqırhonuthayde mırle; İ naqla dkowe qrobe u taxtuşe ban athrawotho klozım dmişadarlın mcadrınwotho noşoye, u dmiamni a nuqazyotho du thumo leşan dmınqoli a mcadrınwotho. Elo u mede dkowe adyawma b’Tel Koçer delqublo du medano’yo bıthır mu fusqono dmıdle u Mawtbo di Mşaynutho.

Mawdıc du futoho d’Bab Alhawa b’fusqono Emwothoyo, kısonıd a marhıbone d’Tahrir Alşam dkıtne i celtho dıkmdawım u qrobo b’Suriya, u mırle; Amerika u Rusya kfulhi laşan dımthabti a yuthronathe b’Suriya u dımdawım u qrobo bu madınho. Elo i Mdabronutho yothoyto kfulho leşan dmihayıd u cafro d’Suriya u dmişatıs system demoqratoyo la came u gawne mşahılfe di fnitho, mawxa khozina kull naqla dkito qrobo folitiqoyo u momunoyo mqabıl da came du garbiyo udu madınho d’Suriya.

Bebzabno, Bakır mawdacle du sxoro di nuqazto d’Tel Koçer fusqono dlatyto lu yuthrono di noşutho, cal dıkmathıl tahdid la haye d’5 mılyune dıbnaynoşo u galwoye dıkhoyın ba fenyotho di Mdabronutho yothoyto. Calathe, Bakır sımle qroyto l’Emwotho Mhaydotho d’dorşo me hatho a fusqonayda, u dfutho i nuqazto d’Tel Koçer, bnişo dmisım u garanti dmıtyo i mcadronutho la Suriye kulle.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…