İ Scudiye mahıtla şartat laşan dımqadmo mcadronutho momunoyto lu athro d’Lebnon

İ mamlaxtho Caraboyto di Scudiye, mahıtla şartat laşan dımqadmo mcadronutho momunoyto lu athro d’Lebnon.

Mbayın da şartat dımbayni, i Scudiye tlıbla mi şultonutho d’Lebnon ducdo yaste dgıdmişaklo bu dactid, dsaymo şuhlofe çıddi udıkmicoşi b’gawıd du athro. 

U athro di Scudiye dımakadle i awyuthayde camo camo d’Lebnon, mawdacle ste di mcadronutho di şultonutho sbutho masırtoyo cama şuhlofe çıddi dıklozım dmafitolın la haye.

U mawtbo da wazire di Scudiye bu buyono dıfrısle lu tboco froso mırle ”i mamlaxtho naqla hreto kımakdo i awyuthayda camu camo d’Lebnon bu zabno da krize udi ciqutho. Elo i şultonutho ducdo yaste i şultonutho dgıdmişaklo bu dactid, laşan dqathla mcadronutho klozım dmafito la haye şuhlofe çıddi, dsaymo u garanti dmıtyo i mcadronutho la n’idotho dıkşowın ela, udnıfqo mqabıl da tahrazyotho dkobın aftho la mahırwone dkıbşi u dactid d’Lebnon”.

Meqım mathe bu yawmo şatonoyo qamoyo du furqoco du lmino d’Bayrut, u athro di Scudiye sımwole qroyto dmitabde buqore emwothoye cali sbutho du furqocano dıqtılwo ebe zıd m’200 farsufe dkıtne bi sagiyutho ma n’abne du camaydan di cito Suryoyto Marunoyto u Malkoyto dıkhoyın bi şawtho Mşihoyto di Aşrafiye.

Cali sbuthathe, u rişızgado di Scudiye b’Lebnon Walid Albuxari mırle ”i mamlaxtho makadla i ulsoyutho dmisım buqore emwothoye şafye u şarye, laşan dmitagle cala celotho du furqoco rabo u mahişono du lmino d’Bayrut”.