I Scudiye mdela qyomo di methcadronutho cam Ukraina

KIYEV – U rişathro d’Ukraina Volodimer Ziliniski, mıstaqbele adyawma bi mditho d’Kiyev, u waziro di baroyutho di Scudiye amiro Faysal Bın Farhan dsımle socurutho dkıtyo i qamayto dkulle dıksamla athro Caraboyo l’Ukraina, mu zabno dmabdele u qrobo 24 bu yarho d’Şbot di şato da 2022.

Bi ytawtathe, Bın Farhan naqla hreto makadle di mamlaxtho di Scudiye b’fusqono kamiloyo dsındo a’fulhone emwothoye kulle dkıtlın u nişo dşorın u kriz bayn d’Rusya u Ukraina bu darbo folitiqoyo u mşayno. Bın Farhan dmawdacle du athrayde kfolıh cama gabe kulle bnişo dmımte l’şroyo bi sbutho du krtiz d’Ukraina, makadle ste di şultonutho d’Alriyad kımdawmo a’fulhonayda, bnişo dmitaxıf u tathir dıtrele u qrobo bu haqlo noşoyo.

Camgabıdathe, Bın Farhan mdele qoyomo di methcadronutho bu timo d’400 malyune dolare camu mdabrono du makıthbo du rişqutno d’Ukraina Andre Yermak.

Lfuth u qyomo dımde, i Scudiye gdımqadmo mcadronutho noşoyto l’Kiyev lfuth tahrazto mşawtafto cam Ukraina bu timo d’100 malyune dolare, cam şıklat mşahılfe du nafto bu timo d’300 malyune dolare.

M’gabo hreno, Ziliniski mqadamle tawdiyotho lu waziro di baroyutho di Scudiye calu snodo dıkmahwele u athrayde lu şlomo uli morutho d’Ukraina uli mşaynuthayda.