İ sferyawmo d’The Times mawdacla da n’Othuroye dmaxlaswolın mu Sayfo da Cuthmanoye ocdo naqahreto hawın nişo da qatle d’Turkiya

İ sferyawmo Britanoyto d’The Times, mawdacla da n’Othuroye dmaxlaswolın mu Sayfo da Cuthmanoye d şato da na’1915, hawın ucdo nişo l’qtolcamo hreno dsımla Turkiya udkımdawmo dsaymole bi fnitho du xabur bu garbay madınho d’Suriya.

The Times bu tebo dıfrısla, grışla u zuhoro cali iqartho Othuroyto harayto dmahzamla mi qritho dı Tel Tawil, bi netiçe da foqucwotho dımhalqila Turkiya cala bote da mdinoye di qritho.

İ sferyawmo Britanoyto d’The Times ba buhone dsımla bi fnitho Othuroyto du Xabur dıknıflo bu garbay madınho d’Suriya, mawdacla du camaydan du Xabur dıkmıtyaqanwo di casquthayde tayimo camu qşoco du tukoso marıhbono dı Dacış, fawdo mıftakarwole. The Times mawdacla bıthır mıdşafıc tloth ışne calu qşoco dı Dacış, kmisım ucdo hçomo hatho cala Othuroye du Xabur, l’darğo d’32 qıryawotho dkıtne cal sapthıd du nahro fayişi xalye, a’kohne azzın wa citotho sxiri, ubalhude kito menyono nacimo d’gabre dkıtyo cımraye ba hamşiyat, udıktıcni bidothaye zayne du Klaşinkov wu tathir da hçome bıqrihutho kmahwe bu hsurono dıhzelın a’botaththe.

The Times mathkarla dı Turkiya ksaymo calu garbay madınho d’Suriya qrobo dlatyo fhimo lıbritho, elo b’şıkıl mede mahwewo ela snodo mu rişono d’Amerika dmeqım Donald Trump lfuth u mede dıkthule u matibono di sferyawmo Britanoyto Richard Spencer dıkmıçğalwo cam farsufo mu camaydan dkıtwe kalyo camu w’abro du ahuno cala thume di qritho Othuroyto dı Tal Tawil dkıtyo masırto cami qritho d’Im Wağfa. Andriyas Zayya dcımre 60 ışne udıkmıçğalwo camu gelyunoro Britanoyo, mawdacle da tarte qıryawothani maxlın ma neşe uma nacime dınqili l’ğer dukotho. Hathe ste cal di qritho dı Tel Tawil hçımwo acla kmo naqlat ma haylawotho Turkoye dıkrıhqi balhude tlotho kilomıtre mena. Ubi netiçe du hçomano, i iqartho harayto dfayşowa bi qritho mahzamla l’ğer duktho, u adyawma balhude şawco gabre kfayşi bı Tel Tawil laşan dsaymi u sutoro di qrithaththe dıkmotewo u menyono da comurayda meqım ma hçome marıhbone dı Dacış di şato da 2015 l’1300 farsufe.

Lfuth a’buhone dsımla i sferyawmo d’The Times, a’Mşihoye d’Suriya udu Iraq maxlaslın m’qtolcame kamile dsımwole u rejim d’Suriya wu tukoso dı Dacış u hayle hrene ba tre athrawothani. Elo a’Mşihoye d’Suriya udu Iraq dıkmıçğoli bu leşono Orumoyo dmıçğewole ebe Mşiho kloqın  ucdo cayni tehdid. Wa 20 alfo Othuroye dıkcayşiwo bu Xabur xıd galwoye bıthır mu qtolğenso da Cuthmanoye di şato da na’1915, kloqın ucdo tehdid m’Turkiya.