İ Sictho di Rişonutho d’MUB frısla egartho d’buyoye calu şunoyo du hadomayda Hanne Mirza

İ Sictho di Rişonutho du Mawtbo Umthoyo d’Bethnahrin, frısla egartho d’buyoye calu şunoyo du hadomayda Hanne Mirza. Hanne Mirza dıkhoyewo b’Örebro du Swed, nqil ma hayani bu zabno dkıtwe b’socurutho b’Turabdin.

Umnoho d’Hanne Mirza, u babo du hawraydan Yahkub Mirza’yo dkıtyo bi Sictho Mdabronitho du Mawtbo uda ahonunayde dkıtne hınne’ste hadome b’MUB.

İ egarthathe du Mawtbo Umthoyo d’Bethnahrin ba melani kımşaryo; U Hawraydan Hane Mirza, ba hayayde kulle sımle harake bi mşalutho di hdoyutho umthoyto, cama 4 abneyde hawi hadomo d’MUB, mşajacle i eqarthayde kula dımqadmi teşmışto lu ağuno di hirutho du camayde, bu suqimo d’24.09.2021 nqil ma hayani a zabnoye, u kcayşina u haşo dı fliğ me baynothayna.

MUB mırle; Hane Mirza dımhase b’cımro d’85 ışne, mawlıd u yaru bi qritho d’Bote d’Turabdin. Hawi ha ma stadin di qritho d’Bote dkıtwa idıcto bu syomo da gdone. Hule xıdme li cito, taht kul şartat manhatle la haye u ağuno di haymonuthayde dcaşla u dmacışla. Xıd ğalabe Suryoye huweste mgalwele mu athrayde cami bethzawgayde Hana Garıs Mirza dımhasyowa meqım tarte ışne, u cama nacimeyde, u raku bu athro du Swed bi mditho d’Örero. Bu Swed’ste mdawamle dmamte li duktho i mşalutho dkıtwole li citayde ulu camayde. Ba ışne haroyani hawile dawro bu hethotho di cito d’Mor Afrem uba fulhone du maşıqlo qonunoyo di cito.

MUB komır; Cal dıdactwo i olsoyutho du ağuno umthoyo, mıştawtafle xıd hadomo hfito aktif la fulhone du Mawtbo Umthoyo d’Bethnahrin. Mıştawtafle la hfiwothe dsimi, mnasele dmaşmıc qole camu qolo da olufe ma abne du camayde lı britho. Me gabo hreno mnoho Hane Mirza hawi ma mşatosne du froshezwo Suroyo. Camu şfoco di termithathe i umthoyto la haye, u sabrayde yaru wu moralayde qawi. İ hiyoyuthayde, wa timoyothayde bşıkıl banoyo u bı klayto d’nıshono mdafcile beyn da came. Cal dıhzele u ağuno xıd timoyutho di eqarthayde udu camayde, kul naqla hawi sanodo maddi – macnawi. Cıl mu cımrayde lku duktho dazze mdafacle calu ağuno, mahkele a nişe d’MUB u kul naqla kali si şrolutho. Hawi babo mathlo, farsufo mothonoyo, u kul naqla sımle federakiye li eqarthayde ula noşe dılhedorre. U hadomo d’MUB mnoho Hane Mirza dkıtwe mothonoyo u dkıtwole nişe umthonoye, kul naqla gıdhowe leşanayna farsufo dıklozım dmimıd mathlo.

Bu huthomo MUB mırle; Xıd Mawtbo Umthoyo d’Bethnahrin leşan dımtena la nişe du mnoho Hane Mirza uli lhiqutho du camadyan dkıtle lu athrayde, a mşalonwotho wa wolyotho dıknıfli calu ağunaydan gıdmamtenalın li duktho. Bi ohnuthathe bi qamayto kıqadmina a buyoeydan lu abrayde Yahkub Mirza dkıtyo u hadomo di sictho Mdabronitho d’MUB, ula abnayde Adnan, İbrahim u Metin dkıtne hadome d’MUB, la nacimeyde kulle, ulu ahılayde. Kfılğina u haşaththe u kmathkırinale b’iqoro.