İ Sictho du parlamento du mawtbo d’Urifi fsıqla dı Turkiya mşadarla marhıbone Suriye lu qlimo d’Qarabax

I Sictho du parlamento du mawtbo d’Urifi PACE, fsıqla ruşmoyith dı Turkiya mşadarwola marhıbone Suriye lu qlimo d’Qarabax, leşan dımcadri Azerbejan bu qrobo mqabıl d’Armenya bi şato dşaficina.

I Sictho Urifoyto bu quwola dsımla, mawdacla du fusqonano mafıt la haye lfuth a ithbate dkito bidotha bi sbutho da marhıbone dımşadrila Turkiya l’Azerbejan.

I knuşto du parlamento du mawtbo d’Urifi PACE dkıtyo i sictho emwothoyto şultonoyto rabtho dkulle bıbritho, maglela liholo dı Turkiya mşadarwola çatawiye Suriye laşan dımcadri Azerbejan bu qrobayda mqabıl d’Armenya bi şato dşaficina.

Bu tebo dıfrısla i knuşto Urifoyto bi dafayda, mawdacla du fusqono dmıdla bi sbuthathe m’ayıd ruşmoyith bıthır ma droşe rwihe dsimi meqım tlotho yawme, u mathkarla dkito ithbate di şultonutho d’Azerbejan mıstacmela çatawiye Suriye bu qrobo d’Nagorno Qarabax bi mcadronutho dı Turkiya.

Bebzabno, i knuşto awkith i sictho d’Pace tlıbla mi şultonutho d’Anqara dhowela methcadronutho kamılto camu bethdino da zedqe noşoye d’Urifi bi sbutho da şkuwat dımqadmi mqabıl dida bi dacwa da çatawiye d’Suriya.

Turkiya u Azerbejan dıftıhlın dacwa mqabıl di netiçe du taşroro dıfrısla i knuşto Urifioyto, lımakşarlın dmaqimi mene i meltho da çatawiye d’Suriya, elo i knuşto bu quwolo dsımla 68 qoyume Urifoye rfıdlın dmişahlıf mede b’gawıd du taşroro mqabıl d’28 qoyume dmırlın E.

U taşroro dım’ayıd ruşmoyith mu Huyodo d’Urifi komır ”Azerbejan mıstacmela mzayne Suriye bi mcadronutho dı Turkiya bu qrobo d’Qarabax, baynothayeste dmıstacıml bu gbino du qrobo. A’mzayne Suriye bu darğo qamoyo mıştawtaflın lu qrobo laşan yuthrone dilonoye, udothe dmıqtoli huwo şudoyo la yaqrothaththe dmitahwelın tezminat u ğensoyutho Turkoyto. U şıkıl di masırhonutho da mzaynani wu nqolaththe l’Azerbejan kşuyo li meltho d’çatawiye”.