12/03/2020

İ sictho Mşihoyto yatiwo cami mdabronutho yothoyto demoqratoyto di Gozarto d’Suriya

İ sictho Mşihoyto dkımmathlo u mawtbo da citotho uhın ma gabe u şutose du qlimo di Gozarto d’Suriya, yatiwo cami mdabronutho yothoyto demoqratoyto.

Bi ytawtathe, drişi a’qetre dkito bu qlimo di Gozarto d’Bethnahrin u aydarbo kibe dmisım fulhone mşawtfe bnişo dmınfuq mqabıl da qetre uda casqwothani.

Taşdarto mi sictho Mşihoyto dkımmathlo u mawtbo da citotho uhın ma gabe u şutose du qlimo di Gozarto d’Suriya, yatiwo cami mdabronutho yothoyto demoqratoyto du qlimo.

İ taşdarto di sictho Mşihoyto dımrayşınole Caziz Aahe, sımla athmıl socurutho lu qentrun di mdabronutho yothoyto dkıtyo bi mditho d’Camuda. U mıstaqıblo ma tre rişone zawgoye du mawtbo nomusoyo di mdabronutho yothoyto Gusayn Alcazzam u Arya Mulla Xalaf umu rişono zawgoyo du mawtbo mşablono Talcat Yunıs.

Bi ytawtathe, a’tre gabe makadlın dıklozım dhowe esore u sdirutho bayn di sictho Mşihoyto wi mdabronutho yothoyto, bnişo dhowe fulhone mşawtfe udmışrın a’qetre dkito bu qlimo di Gozarto bu maşıqlo casqano ducdo.

İ ytawtathe athyo luhwoyo calu talab dhawile i qadişutho du fatıryarxo di cito Suryoyto Qatholiqoyto Mor İğnatiyos Yusıf Tlithoyo Yunan. U medano kothe li mıcne di cito Suryoyto fayış kımqadmo li mdabronutho yothoyto ukıbco dhowelın esore camıhdode, elo u mede dıgorış u zuhoro qay i sictho Mşihoyto lıkyıtwo cama mşale dkımmathli u camaydan b’gawıd di mdabronutho yothoyto, bnişo dmınqoli a’talabe da gabe u şutose du camaydan li mdabronutho yothoyto.

Check Also

U parlamento d’Australia tlıble mi şultonutho du Iraq dımşatso şultono yothoyo lu camaydan dıkhoye bi daşto d’Ninwe

U parlamento federaloyo d’Australia, bıha femo tlıble mi şultonutho du Iraq dımşatso şulto…