İ şıltonutho d’Turkiya kmawfıqo carqalyotho lu tecmiro da citotho b’Antakya

TURKİYA –  Bıthır mu zulzolo dhawi bi fnitho d’Antakya d’Turkiya a citawotho da mşihoye dkıtne ba mdinothani du zulzolo hzelın husrono rabo.  Lfuth i socurutho dsımwole Suroyo TV la mdinothani, hawınwo sohude la citawotho dı shifi b’Antakya, İskenderun, Adiyaman, Altınözu Arsuz wi Swediye (Samandağ). Bi sagiyutho da citawotho dkıtne ba mdinothani shifi u ğalabe mınayye matın lınfolo u laybe mitıstacmli la slawotho.   

Bıthır mıd a mşihoye dıkhoyın ba mdinothani qadiri dımdabri mcadronwotho. Bebzabno hzelın a husrone dhawın, mşarelın dmıftakri aydarbo kibin mşatsilin bote u dmacmıri a citawothathe dkıtne dukotho du ltomo elayye.   

Bu zabno dkıtne ba ftakarani du tecmiro, i şıltonutho frısla mawdconutho di cito d’Mor Circis dkıtyo b’Altınözu bi qritho d’Sarılar, klozım mıshofo, mi cıltho dlatyo msagalto ruşmoyto xıd cito.  İnaqayo ha kımşayıl işıltonutho hul adyowma lohızyowa i citathe,  ucdo inaqa dathi u tawfonano cala mşihoyani athi lbola dmawdci di cito latyo msagalto.  

Bu dumyano i şıltonutho d’Turkiya mdarbet dımcawno a mşihoyani dfayişi u hmiro di mşihoyutho bu qentrun di mşihoyutho, kmawfqolın zıttır qatre.  Elo bıthır ma sturye dıfrisi bu tbocofroso knuşyoyo mahıt warqo cali cito dkıtyo cayıd du waqıf.  Bi sbuthathe u mede du camo mşihoyo kibe soyım dsonıd a mşihoye di fnitho d’Antakya laşan dqudri naqla hreto dı fayşi ba dukothani dıfriso i mşihoyutho menayye lı britho kula.