10/03/2021

İ socurutho du Papa grışla u zuhoro cala mşihoye du Iraq

U camaydan du Iraq dmahwele ifsihuthayde bi socurutho dsımle u papa lu athrathe, b’lebo twiroste kımqadmi bu zabno dıkmitahke calu tathir dıkmıntır dhowela i socurutho di qadişuthayde cali aykanoyutho du camaydan bu Iraq.

 Camgabıdathe, u Huyodo d’Urifi maglele du papa bi socuruthayde lu Iraq, kali bu zyudo dkule cali dhılmiye u calu qrobo da mathabe dcayşiwole a’Mşihoye ba 10 ışne dşaficina.

 İ iqartho d’Yusıf Gorgis dıkcayşi hani ışne bi şawtho d’Alkarrada bı Boğdod, i feshutho dhawiwola mi socurutho dsımwole u papa Mor Fransis lu Iraq lımdawamla l’zabno yarixo. İ dukano d’Yusıf Gorgis dkımzabın eba sniqwotho u alat da radoyotho hul ucdo sxırtoyo bi netiçe du hboso dıkmisım acle mhın hayle dlatne idice. Gorgis dkıtyo ba hamşiyat, bi maqırhonutho dhule li dafo Iraqoyto Alhura mırle “kito grube mzayne kmaydi zuze meni mqabıl du sutoro di dukanayde dkıtyo bu qentrun d’Almaşın di tagorutho bı Boğdod. Ba nışne haroyani a’zuze dıktılbilın menayna a’grubani hawın zıd mu mede dıkqımrinale”. Bebzabno, Gorgis mawdacle dkıtle zuctho ma grube mzaynani dıturi i dukanyade udmanıhbila, yaste dobila l’noşo bi kıre dlo xabro dide xdu mede dhawiwo acme meqım. Gorgis komır “i socurutho du papa kiba dıtıcno camruha şroye, elo latne şroye msarıhbe xdu mede dıkmıntır. Ahna b’surhobo kowina fsoqsabro”.

Camgabıdathe, u kohno di marcitho d’Boğdod qaşişo Marten Bunni bi maqırhonutho dhule li dafo d’Alhurra, mawdacle di socurutho dsımle u papa lu Iraq tcınla camruha sabro la Mşihoye, utrelaste a’rişone folitiqoye u tawdithoye dmıgrış u zuhoraththe zıttır lafa Mşihoye. Qaşişo Marten dmahwele sabro di socurutho du papa dsaymo u garanti da zedqe da Mşihoye udu sutoraththe, mırle ste “u medano kibe dlowe b’surhobo”.

M’gabo hreno, u rişono di sictho du parlamento d’Urifi dkımcaqbo a’sebwotho du Iraq Domenik Devesa, bu buyono dıfrısle cali socurutho dsımle u papa Mor Fransis lu Iraq, mawdacle dkıtle sabro di socurutho di qadişuthayde dmaqwiyo i ciyeşe zıttır bayn da Ciraqoye, udmitahwelın a’Mşihoye wa came hrene du athro i hiruthaththe wa zedqaththe kulle.

Devesa mırle ste “i socurutho du papa bu zyudo dkulle kalyo cali dhılmiye ucalu qtobo da mathhabe dcayşiwole a’Mşihoye Ciraqoye ba 10 ışne dşaficina”.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…