İ Şultonutho d’Turkiya kımdawmo a msokeyda

Turkiya bıthır mıd mkamela ahçomayda cali PKK bu garbyo du Iraq, kımdawmo ucdo ba msoke da farsufe dıkmıthomi bi asirutho dcamu gerilla Kurdoyo.

 Lfuth u tboco froso Turkoyo, msik 27 farsufe ma thome dcami PKK, elo Fırat News kımawdıco, dımsik ban 24 şoce haroyani 71 farsufe.

Turkiya kmidoco bı britho, bu hbosayda dcala folitiqore dkıtne saqıbloye udu gerilla di PKK. Lfuth u tboco froso Turkoyo dkıtyo masro bi şultonutho, msik yawme d’Huşabo 27 farsufe dıkmıthomi bi asirutho dcami PKK bu qlimo du Van.

A Turkoye kımawdıc, ba cuqobe dsimi bu Van msiki a 27 farsufani dkıtne hadome bu zawco di claymutho di PKK. Anadolu kımdace, da farsufani mhadriwo ruhaye dhuçmi athmıl cala dukotho di şultonutho. Elo u mınyonano da msikoye d’Anadolu saqıbloyo’yo lu mınyono da farsufe dımsiki lfuth i dafo Kurdoyto d’Fırat News.

İ dafo Kurdoyto kımawdıco, ban 24 şoce haroyani msıkle u polis Turkoyo 71 farsufe ba cuqobe frişe dsımle cala Kurdoye. İ wazirutho di gawoyutho d’Turkiya mawdacla athmıl, dımsıkla 718 farsufe; beynothaye hadome d’HDP, ba cuqobe haroye dsımlın bu athro. Me gabo hreno Turkiya mahwela hfuxyo mqabıl d’Amerika, cal dlo krıhla u qatlo d’13 Turkoye bu garbyo du Iraq.

Turkiya mdacela da 13 mdinoyani, qtili mi PKK, u Woşington klozım dkurho u qatlano. İ şultonutho Turkoyto qrelaste lu rişizgado d’Amerika dkıtyo b’Ankara leşan dorşo u şwolano acme u mırlale; Kımmitu dlıksunditu i marhıbonutho, elo bi şrorutho kımahwe dıkmayditu i xasrayda. Xıd funoyo u rişizgado mqadamle a buyoayde la yaqrotho da mithe u mfanele; Amerika latla niye dobo maqırhonutho u d’kurho u hçomano-hol dlo motela mawdconutho kamılto bi sbuthathe.