İ şultonutho hathto d’Almanya ba tre yawme qamoye di wolithayda, madcarla 286 galwoye lo ruşmoye ma thumayda

BERLIN – İ sferyawmo Almanoyto d’Bild maglela athmıl, calu menyono da galwoye dımnaselın b’şıkıl lo qonunoyo dşıfci lu athro d’Almanya yawme d’Hamşo u yawme d’Cruto dşaficina. 

Lfuth a’statistike dıfrisi, 365 farsufe mnaselın ba tre yawmani dşıfci lu athro d’Almanya dlo tahwiyotho ruşmoye. Baynothaye 286 farsufe madcıri ma thume, u 19 hrene dırfidi a’talabaththe di galwoyutho dımqadmilın cala thume. 

Cala celotho dırfid u tecbiro da galwoyani, u tboco froso gawoyo d’Almanya mawdacle da farsufani kıtwolın vizat u tahwiyotho saxta lo qonunoye, ubaynothaye ste farsufe dkıtwo manciye qum du cboraththe la n’arcotho d’Almanya. 

Bebzabno, ba tre yawme qamoye mu cımro di şultonutho hathto d’Almanya, msik 14 qaçağçiye cala thume, u hew ste amro dmımsık 48 hrene, ucamgabıdathe msik 9 farsufe dıkmıthomi bi tuhmonoyutho. 

A’tedbirani athın luhwoyo bu zabno dxayifo i şalqa di galwoyutho b’Almanya. Lfuth a’buyone di şultonutho d’Berlin, u menyono da farsufe dımraçaclın lu zedqo di galwoyutho mati ba tlotho yarhe qamoye di şatathe l’37 alfo u 387 farsufe. Ubu şıklano u menyono dımqadamlın lu zedqo di galwoyutho naqıs 46% mqabıl dcayni medho d’zabno di şato dşaficina.