İ taşdarto du Huyodo d’Urifi dıkseymo duyoqo cala guboye yatiwo cama mathlone da came qalile du Iraq

İ taşdarto du Huyodo d’Urifi dıksaymo duyoqo cala guboye gawonoye du Iraq, yatiwo cama mathlone da came qalile du Iraq.

Bu knuşyano, a’mathlone da qalilwotho umthoye u tawdithoye du Iraq hulın i hzayto dkıtlın lu maşıqlo folitiqoyo da guboye, u tlıblın dmişahlıf u qonuno da guboye dlıkobe fsoso la qalilwotho dhınne dımbayni a’mathlonaththe b’gawıd du parlamento du Iraq.

18 bu yarhano, i taşdarto du Huyodo d’Urifi dıksaymo duyoqo cala guboye gawonoye du Iraq dıkmıntır dmisomi 10 bu yarho dı Tışrın u Qadmoyo dıbqamuthayna, mtayabla knuşyo cama mathlone da came qalile umthoye u tawdithoye du Iraq, bnişo dhowela mawdconutho cali hzayto da camani ucali zuctho dkıtlın mu maşıqlo da guboye.

İ taşdarto d’Urifi dımrayşınola Viola Von Cramon, mu taraf du camaydan ste u notarrozo gawonoyo du gabo d’Bethnahrin Demoqratoyo Romio Hakkari, hadır bu knuşyano xıd mathlono du camo Kaldoyo Suryoyo Othuroyo du Iraq. Hakkari bu mamlo dsımle, mahkele cali hzayto gawonoyto du camaydan uda gabayde wi zuctho dkıtlın ma koalisyone Iraqoye rabe d’bılci u sahmo du kontenjan dımbayın la came qalile bu parlamento du Iraq. Callathe, Hakkari tlıble mi taşdarto Urifoyto dkılyo cala qatre u casqıwotho dkıtlın a’qalilwotho, dsındo a’zedqe u talabaththe udıdırşolın cama more du fusqono folitiqoyo du Iraq. Bebzabno, Hakkari tlıble mi taşdarto d’Urifi dmişahlıf u qonuno da guboye Iraqoye, bnişo dmisım u garanti dminaqın a’mathlone şarire da came umthoye u tawdithoye du Iraq, udmıştawtıfi lu maşıqlo folitiqoyo hatho du athro.

Camgabıdathe, Hakkari grışle u zuhoro cali aykanoyutho du camaydan di daşto d’Ninwe wu mede d’athiwo b’rişaye xıd rdufye, qatle u golutho bu zabno dıkbışwole Dacış i fnitho bi şato da 2014, ubebzabno mşalatle bahro cali aykanoyutho lo tawto du camaydan bıthır mu huroro da fenyothaththe a’makthabzabnoye di daşto, cal dıkmidoşi hul ucdo ukmitazici, bnişo dmıçbori dımgalwın mi fnitho udmitahıt ido cala bote u mulkonaththe.