İ taşdarto du Mawtbo d’Suriya Demoqratoyto kımdawmo a ytawyothayda cama mşale Amerikoye

İ taşdarto du Mawtbo d’Suriya Demoqratoyto, kımdawmo a ytawyothayda cama mşale Amerikoye b’Waşington, bnişo d’dorşi u dactid di Mdabronutho yothoyto bu taro du maşıqlo folitiqoyo hatho d’Suriya.

Ba ytawyotho haroye dhawın, a mşale Amerikoye naqla hreto makadlın da hayle du koalisyon Emwothoyo gıdfayşi b’Suriya, leşan dsındi a Haylawotho d’Suriya Demoqratoyto mqabıl di marhıbonutho.

İ dafo ruşmoyto du Mawtbo d’Suriya Demoqratoyto, bu tebo dfrısla mawdacla di taşdarto du Mawtbo kımdawmo a ytawyothayda cama mşale u hadome di kongre d’Amerika b’Waşington, bnişo dmıdroşo i aykanoyutho di Mdabronutho yothoyto bu taro da şuşote haroye d’kowın b’Suriya, u dmıgrış u zuhoro cal sebwotho hrene beynothaye u maşıqlo du qrobo mqabıl di marhıbonutho wi şalyutho b’Suriya.

İ taşdarto d’MSD kmişaklo mi rişonitho zawgoyto du Mawtbo Mşablono du qlimo di Gozarto Nazira Gawriye dkıtyo bebzabno i rişonitho zawgoyto du gabo du Huyodo Suryoyo d’Suriya, u mathlono d’MSD b’Waşington Bassam Sacid İshaq dkıtyo bebzabno u rişono du Mawtbo Suryoyo Athronoyo d’Suriya, i rişonitho zawgoyto du mawtbo mşablono d’MSD İlham Ahmad wi mathlonitho d’MSD b’Waşington Saynam Muhammad.

İ taşdarto d’MSD laqyo u hadomo di sictho da esore baroye du mawtbo da senatore di kongre d’Amerika senator Christofer Van Hollen, u hadomo di sictho dıkmbayno i butça di kongre qoyumo Luis Frankel wu rişono di sictho da zayne qoyumo Adam Smith. Ba ytawyothani, i taşdarto d’MSD drışla a şuşote haroye du kriz folitiqoyo d’Suriya, wi ulsoyutho du dawro dıkmıştacyo Amerika bu şroyo du krizano lfuth a fusqone Emwothoye ubi qadmoyuthathe u fusqono du Mawtbo di Mşaynutho da 2254.

Camgabıdathe, a 3 mşale Amerikoye naqla hreto mawdaclın dıksundi a hayle d’QASAD wu qrobathe mqabıl di marhıbonutho, u m’akadlınste da hayle Amerikoye gıdfayşi b’Suriya u gıdmawmi u snodathe l’QASAD hol dmımte l’şroyo folitiqoyo aminoyo b’Suriya. Meqım mathe’ste, i taşdarto d’MSD hawiwola ytawyotho cam mşale di wazirutho di baroyutho d’Amerika udu Qusro Heworo.