İ turnuwa rbicoyto du papa Mor Fransis di esfireğlo da citotho d’Boğdod, hthimo bi zoxutho di gudo di cito d’Mor Yusıf

BOGDOD – İ sictho di claymutho Qatholiqoyto di cito Kaldoyto du Ciraq, mtayabla i turnuwa rbicoyto du papa Mor Fransis di esfireğlo da citotho d’Boğdod. A’muroye di turnuwathe simi bu wahdo di cito da tre Şlihe dkıtyo bi fnitho d’Aldora bı Boğdod, bi mıştawtfonutho d’13 gude ma citotho Kaldoye mşahılfe di marcitho d’Boğdod. 

İ turnuwathe hthimo bu muroyo haroyo dımtayıb yawme dı Tre dşaficina bayn di gudo di cito Kaldoyto d’Mor Yusıf wi gudo di cito d’Mor Tuma Şliho. Lu muroyano dqamiro ebe i gudo di cito d’Mor Yusıf dmafıtla tre ğolat, mıştawtafle i qadişutho du fatıryarxo di cito Kaldoyto du Ciraq udıbritho Mor Luwis Rofael Qadmoyo Sako, u mcadronayde u fatıryarxoyo hasyo Mor Basilyos Yaldo, u hasyo di marcitho Armınoyto Ortodoksoyto Oşakan Kolkulyan u menyono d’xuroye u kohne uhın ma mşaçcone d’athın mi marcitho d’San Diego d’Amerika. 

Bıthır mıdkamıl u muroyo, u mşalo di turnuwa qaşişo Hanna Qılo mqadamle tawdiyotho l’Mor Luwis Sako ula hsayo ula kohne dhadiri, ubıthır macızmile laşan dımfarqi şukone cala mıştacyone qamore. 

İ gudo d’Mor Yusıf di esfireğlo hathe da tarte naqlatyo dıkqımro i turnuwa du papa Mor Fransis da citotho d’Boğdod.