I wazirutho di baroyutho d’Amerika m’ayadla u fusqono dmıdle u gabo di PKK dışrele ruhe, u mawdacla dkıtla sabro di dawsathe dmaqwiyo i şalyutho bu qlimo

BRITHO – U tahlufo du malolo di wazirutho di baroyutho d’Amerika Tomy Begit bi maqırhonutho dhule li şabake d’Rodaw, mawdacle d’Amerika kım’aydo u fusqono dmıdle u gabo di PKK bi sbutho du mabcayde dşore ruhe udımhalıq u zayno. 

Begit mawdacle ste du fusqono dmıdle u gabo di PKK zoxutho li mdinoyutho yo, u mırle “Amerika kıtla sabro du şudocano dmamte camruhe şalyutho tawtır lu qlimo kule”. 

Camgabıdathe, i izgadutho Britanoyto dkıtyo bi mditho d’Arbil, m’ayadla hisyaste u fusqono di PKK, u mawdacla dkıtyo dawse ulsoyto laşan du terkiwo du şlomo udi şalyutho bu qlimo kule. 

Mxasra hreto, u malolo di wazirutho di baroyutho du İran İsmacil Baqa’i mawdacle dı Tahran kım’aydo u şudoco di PKK dımhalıq u zaynayde, u mathkarle dkıtyo dawse ulsoyto laşan du nfoqo mqabıl du cnufoyo udu teqwiyo di mşaynutho. 

Bebzabno, u mşalo İranoyo mahwele sabro du maşıqlano dkomıl dımcadır bu teqwiyo di şalyutho b’Turkiya ubu qlimo kule. 

M’gabo hreno, i mdabronutho yothoyto du qlimo du garbiyo udu madınho d’Suriya makadla di tarmitho du şlomo dımbaynole u rişono du gabo di PKK Cabdalla Öçalan kımmathlo şroyo şerşoyo la qetre du madınho mescoyo, u mawdacla ste di tarmithathe latyo balhude lu şroyo di sbutho Kurdoyto, elo lu şroyo da krize dıkmicoşi bu qlimo kule yo.