İ wazirutho du sutoro d’Amerika, gıdmşadro sfito hreto rabtho du qrobo lu Madınho Mescoyo bnişo dım’amno i mşaynutho du yamo

Pentagon m’akadla, dgımşadri cal qariwo sfito hreto du qrobo lu Madınho Mescoyo bnişo dmisım u duyoqo di mşaynutho du qlimano dıkşofıc b’şğuşye rabe bu zabnano. Lfuth Pentagon, u waziro du sutoro Pete Hegseth mawraxle u zabno di wolitho di sfito USS Harry S. Truman bu yamo Semoqo yarho hreno.

Bebzabno i sfito hreto USS Carl Vinson dkıtyo ucdo bu madınho du yamo du Sin, gıdşufco lu Madınho Mescoyo bıthır mıd mkamela u tadbiqat mşawtıfo dsımla cama hayle du Yaban udı Qore i Taymnoyto. U fusqono du şedoro di sfito 2’nitho lu qlimo mid, bıthır mıd Amerika sımla cuqobe cala Houthiye d’Yemen dthimi bu mhoyo da sfinotho dıkşufci u yamo.

U nişo du şedoro da sfinothani’ste dım’amni a xtute du yamo dıkşufci a sfinotho di tagorutho ebeye’yo leşan dlo mıhçım aclaye ma Houthiye. U rişono d’Amerika mzaharwole a Houthiye dmaklın baroyo a hçomani u gzımwole u İran’ste dmakle u şedoro d’zayne la Houthiye-dıksundi u zawco d’Hamas bu qrobayde cal İsroyel.

Bu zabno d’Amerika mawdacla da cuqobayda simi cala cambare da zayne da Houthiye, u gayso d’İsroyel’ste huwle amro lu camo dmoyıd a tedbirayde u dmıgrış me Rafah. İ celtho du amrano’ste mawdıc, a cuqobe dgımabde u gayso cala tukose marhıbone’yo. U zuhoroano du gayso hiw, bıthır mıd qtil 19 farsufe ba cuqobe oyaroye dsımle cal Xan Yunıs.

Beyn da qtiloye, kito u rişono du gefo folitiqoyo d’Hamas Salah al Bardawil wi barthzawgayde. Me gabo hreno u gabo d’Fetıh dkıtyo du rişono Fleştoyo Mahmoud Abbas, sımle qroyto lu gabo saqıbloyayde-Hamas, dnofıq me Ğaza leşan dmihafıd cala haye da Fleştoye. Fetıh mvayacwole Ğaza l’Hamas bıthır ma taxtuşe dhawınwo beynothaye ba 2007.