İbrahim Murad thımle u gabo d’Hizballa cala yuqdone u furqoce dkowe b’Bayrut

Bıthır mıdşafıc zıd me yarho calu furqoco rabo dhawiwo bu lmino d’Bayrut bu athro d’Lebnon,  athmıl naqla hreto hawi yuqdono rabo b’gawıd du lmino u trele zuctho rabtho bayn da bnaymothoye di mditho.

 Cali sbuthathe, u rişono du gabo du Huyodo Suryoyo Tibeloyo d’USUP İbrahim Murad, thımle u gabo d’Hizballa bu tuyobo da yuqdonani a hathe, bnişo dıtole anithbate dkibın dmaglın cali mşaluthayde bu furqoco rabo du lmino d’Bayrut.

 Adyawma ba şoce d’falgıdyawmo, amatfiyone di nuro wa Holikoptere du gayso d’Lebnon qadiri dmatfın i nuro dlayibo athmıl bıha ma cambare du lmino d’Bayrut dımfarqacwo arbıco bu yarho d’Ob dşaficina bi netije d’celotho dheş latne idice.

Bi netije da yuqdonani, i şmayo d’Bayrut mkasyo b’caymo tabo komo, wu medano trele zuctho rabtho bayn da bnaymothoye di mditho dıkcayşi heş bu telolo du tathir dıtrele u furqoco rabo dhawiwo bu lmino d’Bayrut.

U rişono du gabo du Huyodo Suryoyo Tibeloyo d’USUP İbrahim Murad, bi maqırhonutho dhule lu froshezwo d’Suroyo TV, mahwele u hfuxyayde cala yuqdone hathe, mawdacle du gabo d’Hizballa kımdawım dımtayıb furqoce u yuqdone b’gawıd du lmino, bnişo dlohe anithbate dıkmaglın cali mşalutho dkıtle bi sbutho du furqoco rabo qamoyo dhawiwo bu lmino d’Bayrut.

Callathe, Murad mawdacle d’hawi ulsoyo ğalabe du lmino u du bethtawso dkıtne bidothıd d’Hizballa dmitasılmi l’haylawotho emwothoye, u mırle “u nfoqo mqabıl di maysartathe i barbroyto nxilto hawi mede asas dlıkmitanhatle fayış katfo. U cusyono mdinoyo u asas du nfoqo mqabıl di maysartatheyo”. Bebzabno, Murad mawdacle dıklozım u camo Lebnonoyo b’surhobo dıtolıb m’Emwotho Mhaydotho dmakılyo aqtolcame dıksaymilın amaysaryotho du İran bhaq du athro d’Lebnon u du camayde.

Megabo hreno, u rişqutno d’Lebnon Mişel Caun bu knuşyo dımrayşanle du mawtbo celoyo di mudafaca d’Lebnon, mawdacle du yuqdono dhawi athmıl bu lmino d’Bayrut, kibe dhowe bi netije du fulhono du tehriwo dsim bidactho awste bi netije d’fawdo du teknik yaste kibe dhowe mi celtho di saxlutho.

Caun dıtlıble dmisım buqore msarhıbe, makadleste dıklozım dmimıd hşowo ma hayobe, udmitahıt tedbire dıkmınci dhowe hawxa gedşe naqla hreto.