İmdabronutho d’Şigur rfıdla uqyomo d’Boğdod u d’Arbil

İ rişonutho zawgoyto du mawtbo di mdabronutho yothoyto d’Şigur, mawdacla du dawro Turkoyo kmahwe bgawıd du qyomo dımdewo bayn Boğdod u Arbil cali aykanoyutho di fnitho d’Şigur.

 İ mdabronutho yothoyto d’Şigur, mawdaclaste du qyomano dewam du qtolcamo dsımwo cala Yezidoye ma grube marıhbone dı Dacış i şato da 2014.

İ rişonitho zawgoyto du mawtbo di mdabronutho yothoyto d’Şigur Riham Hajjo, bi maqırhonutho dhula lu tboco froso mawdacla dhınne xıd mawtbo hani zabno kımcaqbiwo aytawyotho dıkmisomiwo bayn da mşale di şultonutho qentrunoyto d’Boğdod wi şultonutho du qlimo d’Kurdistan, u mathkarlaste dhınne kıdciwo da tarte şultınwothani kımtaybi qyomo laşan Şigur.

Hajjo grışla u zuhoro calu qyomano dımde dılo mi hzayto da comure d’Şigur, u bu şıkılano Boğdod u Arbil dışlın u sebyono da Yezidoye dhawınwo nişo l’gunhe barbroye cal idothıd da grube marıhbone dı Dacış i şato da 2014. Callathe, Hajjo mawdacla du qyomano dewam du farman da 2014 yo, u bebzabno kmıhşuw xıd ale dıkmitatimo eba i ithutho Yezidoyto b’Şigur, dilonoyith du qyomano lıkobe aftho la Yezidoye dmıştawtıfi b’şıkıl baroyo bi mdabronutho da fenyonathathe. Wu medano xiyeneyo lu admo da sohde Yezidoye. Mawxaste Hajjo mawdacla dkul fusqono dıkmimıd dılo mu sebyono da Yezidoye, lıkmaqıblile hınne xıd mawtbo u lıgıdmamte camruhe netije msimonitho.

Camgabıdathe, Hajjo mahkela cala hjome dıksaymolın Turkiya cali fnitho d’Şigur, bnişo dmafito la haye i siyasayda i kabışto, u ba melani mdawamla “laybe dmikase u dawro dıkmıştacyole Turkiya bu qyomo dımde bayn Boğdod u Arbil, lfuth i mawdconutho dkıtlan, u qyomano mıdhe bi netije du hboso dhawi me Turkiyaste. Mawxa u mede ulsoyo laşanayna dsaymina u sutoro du kenşaydanyo”.