29/04/2020

İmdabronutho Yothoyto du garbiyo d’Suriya mahwela hfuxyo mqabıl di şultonutho Turkeyto

İ mdabronutho yothoyto du garbiyo udu madınho d’Suriya matcanla Rusya u Amerika, i mşalutho da dıyoşe dıksaymolın Turkiya cala fusqone d’Emwotho Mhaydotho dmawdacwola dıklozım ucdo dmitaklın a’qrobe u taxtuşe laşan dmınfıq mqabıl du kewo du virus d’Corona.

Be bzabno, i mdabronutho yothoyto tlıbla mu kenşo emwothoyo dmoyıd i mşalutho dkito acle, bi sbutho da dyoşe dıksaymolın Turkiya ba fenyotho du garbiyo udu madınho d’Suriya, udmıçboro dmafito la haye a’qyome emwothoye.

İ mdabronutho yothoyto du garbiyo udu madınho d’Suriya , bu buyono dıfrısla lu ray gawonoyo dıbritho, mawdacla dı Turkiya lıkmahwiyo yasifutho la fulhone du nfoqo mqabıl d’Corona, uksaymo hjome cala fenyotho di mdabronutho yothoyto cıl mıdmaklın a’taxtuşe bı britho. Ahçomani dı Turkiya kmisomi ucdo bu zabno dkıtyo britho kula şğişoyto bu kewo du virus d’Corona, ubu zabno dlıkmitahwe yasifutho la fenyotho di mdabronutho yothoyto mu tukoso tibeloyo du hulmono.

Callathe, i mdabronutho yothoyto bu buyonayda tlıbla mu kenşo emwothoyo ubi qadmoyutho dkulle mu mawtbo di mşaynutho, um’Ewmotho Mhaydotho dmaydi i mşalutho dıknıflo aclaye bhaq da dyoşe dıksaymolın Turkiya cala fenyotho du garbiyo udu madınho d’Suriya, u hawxa mdawamla “a’haylawotho d’Suriya demoqratoyto d’QASAD hulın funoyo li qroyto emwothoyto dmitaklın a’taxtuşe bayn da gabe mşahılfe b’Suriya, u mawxa klozım dmisım hboso cal Turkiya laşan hiyaste dmafito i qroytathe la haye. Ube bzabno, Rusya u Amerika kıtlın qyome baroye cam Turkiya bi sbutho di tahrazto di ithuthayda b’gawıd da narcotho du garbiyo udu madınho d’Suriya. Wu lfuth da qyomani, ahaylawotho d’QASAD latlın duktho ba fenyotho dıkmıhjım aclaye”.

U buyono di mdabronutho yothoyto tlıbleste me Rusya u me Amerika dmaydi cal ruhaye imşalutho dıknıflo aclaye, udjıbri Turkiya dmafito aqyome dımdhın acma la haye, hatheste cal da gabe kulle dımdelın aqyomani kıtlın mşalutho bi sbutho da hjome dıksaymolın Turkiya cala fenyotho di mdabronutho yothoyto.

İ mdabronutho yothoyto bu huthomo du buyonayda mırlaste “adyoşe dı Turkiya kxılqi şğuşyo, wi mıcnaththe Turkiya lıkıdco hul ucdo u qento du virus d’Corona mınyo. Elo kmıstacımlo a’şartat ducdo, baynothaye i aykanoyutho noşoyto bnişo dmafito la haye atahrazyothayda abceldboboye. Mawxa ktılbina ma gabe mşahılfe dşıfci baroyo li harake, laşan dmaklın a’hjomani dıksaymolın Turkiya”.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…