05/05/2021

İmdabronutho Yothoyto huwla mcadronutho noşoyto lı 5 alfo yaqrotho

İ Mdabronutho yothoyto du qlimo di Gozarto d’Bethnahrin d’Suriya, mfaraqla 5 alfo sahme d’mulko la yaqrotho sniqoye da kantone d’Qamişli wi Hasake.

İ mcadronuthathe hiwo la yaqrotho dımathri a fulhonathe, ma fusqone du karanten gawonoyo du mnoco du cboro nfoqo dmahıt bu garbiyo ubu madınho d’Suriya, bu taro da tedbire du nfoqo mqabıl du virus d’Corona.

 Mu zabno dımbarbazwo u virus d’Corona i şato dşaficina uhul ucdo, i mdabronutho yothoyto du garbiyo udu madınho d’Suriya mahıtwoal ğalabe naqlat karanten gawonoyo awkith mnoco du cboro nfoqo b’gawıd da fenyotho di mdabronutho yothoyto. ubi netiçe da fusqonani dmıdiwo, ğalabe yaqrotho m’athro i aykanoyutho du momunaththe b’şıkıl msimono cal di ciyeşaththe masırtoyo cama fulhonaththe a’yawmonoye.

Cali sbuthathe, i rişonitho zawgoyto du mawtbo du kanton d’Qamışli Perwin Yusıf bi maqırhonutho dhula lu tboco froso, mawdacla di mdabronutho yothoyto du qlimo di Gozarto mfaraqla 5 alfo sahme d’mulkone la yaqrotho sniqoye, baynothaye 2500 sahme mfarqi bu kanton d’Qamışli wa hrene mfarqi bu kanton di Hasake. Perwin mırla ste “u menyonano da sahme di mcadronutho latwe makfiyono, elo lfuth a’mkone dkıtla i mdabronutho yothoyto yo, u kmıhşowi xıd mcadronutho macnawi zıd mıdkıtyo mcadronutho momunoyto”.

Calu şıkıl di tahrazto du feroqo, Perwin mawdacla di mcadronuthathe mfarqo bu darbo di sdirutho dhawyo bayn da mawtbe uda kominat wa şutose di mşablonutho kenşoyto, uba melani mdawamla “camgabıd da tukose noşoye dkıtne hfite bi fnitho, hın ma yaqrotho dkıtyo u momunaththe towo snıdle ste u isniyativano”. Kull sahmo d’muklo dımfarıq kmişakıl m’zayto, şakro, hete u ğer bu timo d’75 alfo lerat d’Suriya.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…