İmtakasto da Neşe bu Iraq ftıhla dukane du şuğlo laşan icleymutho du cameydan

Bı Barıtle, bı Bağdede u bi fnitho d’Şigur, ftih dukane u tarmiyotho momunoye laşan dımcadri u camaydan wa Yezidoye dımdawmi dcayşi ba fenyothathe bu garbiyo du Iraq.

 A dukanani sim u futohathe mi mtakasto da neşe d’Bethnahrin du Iraq u bu snodo momunoyo dımqadım mu şutoso d’Şay Fon di mcadronutho.

 Cıl mu bırbozo du virus d’Corona dhani kımo yarhe dmaklele i dawra da haye bu Iraq u bı britho, i mtakasto da neşe d’Bethnahrin u bu snodo momunoyo du şutoso d’Şay Fond, qadiro dımdawmo hul ucdo bu bnoyo da dukane, dımamno mabuco momunoyo la yaqrotho galwoye dıdaciri la botathe, u dnıfqo moro lu grub di claymutho, bnişo dmısnodi ham maddi u hamste macnawi, laşan dqıdri dmacişi ruhaye wa yaqrothathe ba fenyotho dıshifi xıdi fnitho d’Şigur wi daşto d’Ninwe.

Bi fnitho d’Şigur, i mtakasto da neşe d’Bethnahrin ftıhla şuqo da muklone lu barmothoyo Yezidoyo Başşar, u şqilaste qatco dı cwone lu barmothoyo Yezidoyo Mılhım.

Bebzabno, i mtakasto da neşe d’Bethnahrin bnela dukano du groco du hloqo bı Bağdede u masılmola l’Basima Matti dkıtyo ma bnotho du camaydan di daşto d’Ninwe. İ mtakasto bnelaste dukano du tacmir da talafone di ido lu claymo Baraa Samir, u ftıhla dukano du torno l’Himen Hanna bı Barıtle u dukano hreto di hdede l’Xalıd Gorgis.

Bi maqırhonutho dıfrısla i mtakasto da Neşe d’Bethnahrin, mqadamla tawdiyotho lu şutoso d’Şay Fond dısnıdle atarmiyothani, u hulaste şudoyo dgımdawmo dsaymo tarmiyotho momunoye dkımcadri u camaydan dmarku ruhe b’gawıd du athro.