İqartho mu camaydan mahzamla me Challik d’Nuhadra

İ iqartho d’Marta Xuşaba, mahzamwola me Telkepe bu zabno da hçome da ğrobe marhıbone d’Dacış ba 2014 u rakiwo’wa bi qritho d’Challik d’Nuhadra.

Elo i iqartho, adyawma naqla hreto jbiro dmahzımo mi qritho-lo mi celtho du tukoso marhıbono, elo ma hçome da hayle kaboşe d’Turkiya cali fnitho.

A hçome dıkmisomi b’dukotho frişe du Iraq, kull naqla-bşıkıl baroyo ulu baroyo, kım’athri cala haye dan abne du camaydan. Bu zabno da hçome da marhıbone d’Dacış, mıdwo u camaydan, a Ezidoye uğer qalilotho nişo li barbroyuthathe wu adyawma’ste, cayni mede kımdawmi a tahrazyotho du texliyo du camaydan ma dukothayde a şerşoye.

Ba hçome dsımlın a hayle kaboşe d’Turkiya calu garbyo du Iraq-dilonoyith cal Nuhadra, maxle mınyono d’qıryawotho du camaydan udı came hrene-hdo ma qıryawothani’ste Challık’yo. İ iqartho d’Marta Xuşaba dkıtyo 71 eşne, trewola u baytayda b’Telkepe wu ucdo’ste bıthır ma hçome d’Turkiya, jbiro naqla hreto dmahzımi mi qritho.

Mawdıc belhude fayış u abrayda bi qritho, leşan dhowe moro la haywothathe. İ hılto Marta mırla; Mahzamwolan l’Challık u rakiwina bi qritho u cayşinawo haye towe. Elo mcal fothe da taxtuşani dıkmdawmi beyn d’Turkiya uda Mharbone da Kurdoye, jbirina naqla hreto dmahzımina. Fayış lıkucdina layko gıdızzan.

Ba hçomani, mhewole u gayso kaboşo b’qritho hreto du camaydan-Qısta ubi netiçe maxlıyowa i qritho ma comurayda kulle. Elo ucdo dacır 7 yaqrotho li qritho, cal dlatwolın duktho dızzın u dfayşi. Turkiya mabdewola 23 bu yarho d’Nison şişaltho d’cuqobe hathe calu gerilla di PKK b’Nuhadra, 3 bu yarhano hthımwola a cuqobayda.