İran mamtele renyo dmisım knuşyo cam Turkiya u Suriya lo me Rusya

Bıthır mu qatlo da folhe Turkoye b’İdlib mşarelın a esore bayn Turkiya u la mşale da athrawotho dkıtne mdaxle bi sbuthathe d’Soçi.

 Me gabo Turkiya kımstacmılo a galwoye, me gabo hreno a athrawotho rabe xıd Amerika Rusya kımnasın dımzabni a zayne dkıtlın l’Turkiya, u me gabo hreno u İranste mamtele rınyo dı Knuşyo dlo me Rusya.

 Ba esore dhawile u rişqutno du İran Hassan Rohani camu baramneyde Recep Tayyip Erdoğan mqadamlele renyo, dsaymi knuşyo beyn du İran, Turkiya u Suriya leşan dı durşi u kriz dhawi beyn Suriya u Turkiya. Bu renyano dımqadamle Rohani, trele u athro d’Rusya larwal mi ytawtathe awkith dımdawmi a knuşye d’Soçi u d’Astana dlo mu athro d’Rusya.

Me gabo hreno Turkiya mşarela dmıstacmılo a galwoye mqabıl d’Urifi, leşan dımcadrila bu haqlo du momuno. Mawxa bıthır mu qatlo da folhe Turkoye b’İdlıb, mawdacla Ankara dıftıhla a tarcayda la galwoye leşan dızzın l’Urifi- bu darbo du Yawnan u d’Bulgaria.

Inaqla ha dhoyır cala hezwone wa surotho dkothın ma thume d’Turkiya, kımahwe ftiho aydarbo a qnume Turkoye ktıfki a galwoye lafa thume du athro leşan dızzın l’Urifi. Bhaq di sbuthathe, i rişonitho du Komisyon d’Urifi Ursula Von der Leyen huwla maqırhonutho lu tbocofroso.

Leyen mırla; Urifi me qariwo kımcaqbo a galwoye dkıtne ucdo cala thume d’Turkiya, u ktucnina ğamo rabo cali sbutho. Ucdo ba esore d’camu rişwazire du Yawnan u d’Bulğariana, u mede dkıtyo ulsoyo bi sbuthathe dmicawni a 2 athrawothani’yo. Urifi hadiroyo dımcadır atre athrawothani bu darbo du ajans di mşaynutho da sforay yamo d’Urifi-Frontex. U mede dıkgorış u zuhoro bi maqırhonuthathe di rişonitho du Komisyon, dlıkımbahso mede cal Turkiya’yo, elo kımmo u athro du Yawnan u d’Bulgaria klozım dmicawni.